Б.ДОЛЖИНЖАВ

ОХУ-ын Холбооны Аялал жуулчлалын агентлагаас зохион байгуулсан Монгол, Орос, Хятад гурван улсын аялал жуулчлалын сайд нарын тавдугаар хуралдаан өчигдөр цахимаар боллоо. Хуралдаанаар цар тахлаас үүдэн хамгийн их хохирол амссан аялал жуулчлалын салбарыг эргэн сэргээх, гурван улсын аялал жуулчлалын маршрутыг бий болгох, салбарын хамтын ажиллагааг өргөжүүлэх зэрэг чиглэлээр хэлэлцсэн юм.  Энэ талаар БОАЖ-ын сайд Д.Сарангэрэл “Манай улс  анх удаа аялал жуулчлалыг эдийн засгийн тэргүүлэх салбараараа тодорхойллоо.  Цар тахлаас үүдэн энэ салбар зогсонги байдалд орж, багагүй алдагдал хүлээсэн. Тиймээс аялал жуулчлалын дэд бүтцийг сайжруулах, үйлчилгээний чанарыг дээшлүүлэх, ажиллах хүчийг бэлдэх, мэргэшүүлэх гэсэн олон ажлыг хийсэн. Өнөөдрийн хуралдаанаар гурван улсын хамтран хэрэгжүүлэх төсөл, хөтөлбөрүүийн талаар хэлэлцэж, үр дүнтэй санал санаачлагуудыг хэрэгжүүлэх болсондоо баяртай байна" гэлээ.

Хөрш хоёр орны төлөөллийн байр суурийг хүргэе.

Гурван улсын  аялал жуулчлалын салбарыг хөгжүүлэх үүд хаалга нээлттэй байна

Аялал жуулчлалын агентлагын дарга Догузова Зарин Валерьевна

-Аялал жуулчлал бол улс орнуудын нөхөрсөг харилцаа, найрсаг хамтын ажиллагааг бататгаад зогсохгүй эдийн засгийн маш том салбар байдаг. Энэ утгаараа хөрш гурван улсын хувьд бидэнд энэ салбарыг хөгжүүлэх маш том боломж, үүд хаалга нээлттэй байна гэж бид харж байна. Өнгөрсөн онд манай улсаас 141927 жуулчин Монгол улсад аялсан нь өмнөх онуудаас 9.9 хувиар өссөн үзүүлэлт юм. Бид энэ өсөлтийг алдалгүй гурван улс харилцан зорчиж, аялах жуулчдын тоогоо нэмэгдүүлэх чиглэлээр үр дүнтэй ажлуудыг хамтран хэрэгжүүлнэ гэж найдаж байна. Бид гурван улсын аялал жуулчлалын маршрутыг урьдчилсан байдлаар гаргаж, бэлэн болоод байгааг хэлэхэд таатай байна.

Аялал жуулчлал  бол  соёлыг түгээх гүүр юм

БНХАУ-ын Соёл, аялал жуулчлалын дэд сайд Жан Сью

-Дэлхий нийтээр аялал жуулчлалын салбар бүхэлдээ ганхаж, хүнд нөхцөлд орсон. Гэхдээ Хятад улсын хувьд энэ цаг үеийг даван туулах, эрсдлийг шинэ боломж болгохоор хичээн ажиллаж байгаа. Тухайлбал, бид дотоодын аялал жуулчлалыг хөгжүүлэх чиглэлээр маш их ажил өрнүүлж байна. Аялал жуулчлалын салбар  бол соёлыг түгээх хамгийн том гүүр байдаг. Тиймээс гурван улсын аялал жуулчлалын хамтын ажиллагаа батжих нь улс хооронд эв найрамдалт харилцаа бэхжих үндэс суурь болдог. Тиймээс өнөөдрийн хуралдаанаас гарсан шийдвэрүүд биелэлээ олж, үр дүнд хүргэнэ гэж итгэж байна.

Цахим хуралд гурван улсын аялал жуулчлалын салбарын удирдлагууд, мэргэжлийн холбоодын зөвлөл, төр болон хувийн хэвшлийн аялал жуучлалын төлөөллүүд оролцлоо. БНХАУ-ын олон улсын шинэ нисэх онгоцны буудлаас Монголын авиа компаниуд нислэг үйлдэх, манай улсын Хүннү эйр компани Кызыл, Владивосток хотруу нисэх бэлтгэл ажлыг хангахад дэмжлэг үзүүлэхээ хоёр тал мэдэгдсэн юм.

Эх сурвалж:www.polit.mn