С.УЯНГА

Хуулиа дээдэлдэг төртэй улс оронд бол хэн ч дуугарахгүй, тэмцэхгүй байсан аяндаа ажил нь цэгцэрч хөгжин дэвшдэг. Гэтэл манай улсад ард иргэд нь яаж ч хашхираад дарга нарын чихэнд халдахгүй байгаа юм. Үүний хамгийн тод жишээ бол Хан-Уул дүүргийн XV хорооны нутаг дэвсгэр Удирдлагын академийн хойд талын их жанжин Д.Сүхбаатарын хөшөө бүхий ногоон байгууламжийг сүйтгэж буй үйлдэл. Хүүхэд, хөгшидийн амарч зугаалдаг ногоон байгууламжийг авч үлдэхийн тулд “Академи” хотхоны оршин суугчдад төрийн анхан шатны нэгж хорооноос эхлээд дүүргийн Засаг дарга, мэргэжлийн хяналт, Нийслэлийн хот байгуулалт хөгжлийн газар, АТГ, Хотын даргад удаа дараа хандаж ирсэн. Гэвч иргэдийн эрх ашгийг хамгаалдаг, тоодог газар алга. “Академи” хотхоны оршин суугчид аргаа барахдаа нийслэлийн захиргааны хэргийн шүүхэд хандаад байгаа аж.

Нийтийн эзэмшлийн талбай дээр хууль зөрчин барилга барьж буй “Хурд", “Билиг” компанийн үйлдэл бүр, алхам тутамдаа хууль зөрчиж байгааг нотлох баримт олон бий. Тухайлбал, та доорх бичлэг, зургаас харж болно. “Хурд", “Билиг” компани барилгын ажлаа 24 цаг явуулж кран, өргөгч техникээ автомашины зам дамнуулан ажиллуулж иргэдийн эрүүл, аюулгүй амьдрахад ноцтой халдаж байна. Яг ийм үйлдлийг ганц өнөөдөр биш удаа дараа гаргаж оршин суугчид эсэргүүцсээр ирсэн. Гэтэл мэргэжлийн хяналтын байгууллага хууль журмаа сахиулахгүй дуугүй харж суусаар байна. Муугаар ярихад хууль зөрчсөн барилгын компанийн энэ үйлдлээс болж иргэдийн амь нас эрсдэлд орвол хариуцлагыг хэн хүлээх вэ. Оршин суугчид удаа дараа хандаад байхад хуруугаа ч хөдөлгөхгүй суусаар байгаа Хотын даргын үүрэг гүйцэтгэгч Ж.Батбаясгалан уу, нийслэлийн мэргэжлийн хяналтын байгууллага хүлээх үү.

Олон удаа хэвлэл мэдээллээр хөндөгдөж байгаа Удирдлагын академийн газрын эрхийг яагаад цуцлахгүй байна вэ. Эсвэл эрх баригч намын өв залгамжлагчид болох Хотын даргын үүрэг гүйцэтгэгч Ж.Батбаясгалан, Р.Дагва нар нэг “эзэн”-ий төлөө нийтийн  эрх ашгийг золиослох уу. Хүний амь нас хуулиас илүү мөнгө хүчтэй юу гэдгийг харуулах цаг иржээ.

Эх сурвалж: www.polit.mn