С.САРУУЛ

Дундговь аймгийн Сайхан-Овоо сумын харьяат  98 настай “Фронт” хэмээн алдаршсан С.Цэгмидэд ОХУ-ын Төрийн дээд шагнал “Бүх ард түмнүүдийн найрамдлын одон”-г гардууллаа. С. Цэгмид 1942 оны арванхоёрдугаар сард 18 настайдаа Зөвлөлтийн улаан армид бэлэг хүргэх төлөөлөгчдийн бүрэлдэхүүнд орж, Свердловск орчмын фронтын тэргүүн шугам дээр  очиж байсан юм. Монгол Улсаас илгээсэн бэлгийн гурав дахь цуваагаар 217 вагон бүхий дээл хувцас, арьс нэхий, мах, хүнсний зүйлс хүргэж, мөн ард түмний хөрөнгөөр боссон 40 танкийг чин сэтгэлийн дэмжлэг болгон хүлээлгэн өгч байсан түүхэн үйл явдлын гэрч болж байжээ.

 Ерөнхийлөгч Х.Баттулга өнгөрсөн  наймдугаар сард Дундговь аймагт ажиллах үеэрээ өндөр настан С.Цэгмидэд Монгол Улсын гавьяат малчин цол хүртээсэн юм. Харин өнөөдөр /2020.10.06/ С.Цэгмид гуайг ОХУ-ын Ерөнхийлөгчийн зарлигаар Аугаа Эх орны дайны ялалтын 75 жилийн ойн медалиар тодорхойлсныг олгож  байна.  ЗХУ-д хүргэсэн тусламжийн хэмжээ нь тухайн үеийн Монгол Улсын хоёр жилийн төсөвтэй тэнцэх хэмжээтэй байсан бөгөөд тухайн үед үзүүлсэн тусламжийн гуравны нэг нь манай улсаас очсон болохыг шагнал гардуулах үеэр онцоллоо.

ОХУ-аас манай улсад суугаа Онц бөгөөд бүрэн эрхт Элчин сайд И.К.Азизов ОХУ-ын Ерөнхийлөгчийн зарлигийг уншихдаа “"1942 оны арванхоёрдугаар сард Монгол Улсаас ЗХУ-д хаягласан тусламжийн цуваа манай улсаас хөдөлсөн. Тус цуваа нь  Улаан арми, ЗХУ-ын ард түмэнд хандивласан гурил буудай, дулаан хувцас, хоол хүнс бүхий нийт 217 галт тэрэг байсан бөгөөд цувааг дагалдаж явсан хүмүүсийн дунд С.Цэгмид багтсан. Гурил буудай, дулаан хувцас, хоол хүнс бүхий нийт 217 галт тэрэг байсан бөгөөд цувааг дагалдаж явсан хүмүүсийн дунд С.Цэгмид багтсан. Үслэг малгай өмссөн 19 настай бүсгүй фронтод ирж, тусламжийг гардуулж буй зураг хоёр орны түүхийн нэгэн чухал баримт болон гэрэл зурагт үлдсэн. Монголын ард түмэн ЗХУ-ын ард түмэнд үзүүлсэн тусламжийн бэлэг тэмдэг болсон. Тэрхүү тусламжийг үзүүлэхийн тулд Монгол Улс улс орны эдийн засгийг дайны байдалд шилжүүлэн, бүх боломжоо ашигласан" гэлээ.

Аугаа Эх орны дайны ялалтын 75 жилийн ойн медалиар  1212 хүн шагнуулсны дотор 13 орны 40 иргэн шагнагдсаны нэг нь  “Фронт” С.Цэгмид болж байна.

Эх сурвалж: www.polit.mn