Б.ДОЛЖИНЖАВ

Сүүлийн өдрүүдэд Улаанбаатар хотын хэмжээнд автомашины түгжрэл эрс нэмэгдэж, тэг зогсолт хийлээ хэмээн иргэд бухимдаж байгаа билээ. Тэгвэл энэ асуудлыг нийслэлийн Засаг даргын хуралдаанаар өнөөдөр хэлэлцлээ. Нийслэлийн удирдлагууд түгжрэлийг  авто замын сүлжээ хангалтгүй, нийтийн тээвэр хүртээмжгүй, авто зогсоол дутагдалтай, моторт бус тээврийн хэрэгсэл хөгжөөгүйтэй холбоотой хэмээн үзэж байна. Энэ талаар Нийслэлийн Замын хөдөлгөөн төлөвлөлт, зохицуулалт, инженерчлэлийн газрын дарга С.Энхтөр “Энэ сарын 1-нд 72450 тээврийн хэрэгсэл шинээр бүртгэгдсэн нь өдөрт автомашины урсгал 210-230-аар нэмэгдэж орж ирж байна гэсэн дүгнэлтэд хүргэсэн. Мөн Улаанбаатар хотын хүн ам 1.6 саяд хүрсэн ч 903 том оврын автобус үйлчилдэг. Өөрөөр хэлбэл, 500-600 том оврын автобус нэмж үйлчилгээнд гаргаж байж, хүртээмжийг нэмэгдүүлнэ” гэж ярилаа.

Харин Цагдаагийн ерөнхий газрын дэд дарга, хурандаа Ж.Амгалан “Түгжрэлээс болж гал унтраах, түргэн тусламж үзүүлэхэд хүндрэл үүссэн. Энэ жил 55.9 мянган тээврийн хэрэгсэл шинээр хөдөлгөөнд оролцож байна. Өдөрт 100 мянган тээврийн хэрэгсэл зогсоогоод байхад түгжрэл буурахгүй байна.  Тиймээс ажлын таван өдөр автомашинаа тэгш, сондгойгоор явуулаад үзэх санал гаргаж байна.  Үүнийг иргэдээсээ асуух нь зөв. Ойрын хугацаанд авах арга хэмжээ үүнээс өөр байхгүй” гэсэн юм.

Эх сурвалж:www.polit.mn