Б.ДОЛЖИНЖАВ

Эрүүл мэндийн яамнаас коронавирусын халдварын тархалттай холбоотой ээлжит мэдээллээ өглөө. Сүүлийн  хоёр хоногт ХӨСҮТ-ийн Вирус судлалын лаборатори, ЗӨСҮТ-ийн лаборатори, Дархан-Уул аймгийн Вирус судлалын салбар лабораторит 1159 хүнд шинжилгээ хийхэд  халдвар илрээгүй. Манай улсад батлагдсан 313 тохиолдлоос 303 нь эдгэрсэн. Өнөөдрийн байдлаар ХӨСҮТ-д найман хүн эмчлүүлж байгаагаас зургаа нь хөнгөн, хоёрынх бие хүндэвтэр байна.

Энэ үеэр ЭМЯ-ны НЭМГ-ын дарга Т.Энхзаяа томуугийн вакцины талаар мэдээлэл өглөө. Тэрээр “Монгол Улс дархлаажуулалтын ээлжит 10 хоногийг 26 дахь жилдээ  ирэх сарын 1-10-нд  зохион байгуулна. Монгол Улсын хувьд улирлын томуугийн эсрэг А хүрээний /H1,N1/ болон В хүрээний /H3, N2/ хэв шинжийг агуулсан гурван цэнт вакциныг БНСУ-ын “Green Cross” үйлдвэрээс саяхан хүлээн авсан. Томуугийн вакцинд аймгийн төвийн цэцэрлэгийн 2-5 хүртэлх насны хүүхдүүд, нийслэлд зургаан сартайгаас есөн настай хүүхдүүдийг хамруулахаар бэлтгэж байна. Мөн 65-аас дээш насны ахмад настан, архаг хууч өвчтэй хүн, дөрвөн сартайгаас дээш жирэмсэн эмэгтэйчүүд, эмч, эмнэлгийн ажилтнууд харъяа дүүргийн эрүүл мэндийн  төв дээр очиж, дархлаажуулалтад хамрагдана. Энэ үеэр заавал хийх товлолын дархлаажуулалтаас хоцорсон хүүхдүүдэд вакциныг нөхөн хийнэ. Дархлаажуулалт нь олныг хамарсан цар тахлаас урьдчилан сэргийлэхэд чухал ач холбогдолтой” гэсэн юм.

Эх сурвалж:www.polit.mn