Б.ДОЛЖИНЖАВ

ЭМЯ-наас коронавирусын тархалттай холбоотой ээлжит мэдээллээ өглөө. ХӨСҮТ-ийн Вирус судлалын лаборатори, Дархан-Уул аймгийн вирус судлалын салбар лабораторт 568 сорьцод шинжилгээ хийхэд коронавирус илрээгүй байна.  Манай улсад батлагдсан 313 тохиолдлоос 305 нь эдгэрсэн. ХӨСҮТ-д эмчлүүлж байгаа  найман хүний зургаагийнх нь биеийн байдал хөнгөн,  хоёр нь хүндэвтэр байна.

Харин дэлхийн 188 оронд 33.5 сая хүн халдвар авч, нас барагсдын тоо нэг саяыг давлаа. Үүний тал хувь нь АНУ, Бразил, Энэтхэгт бүртгэгджээ. Тодруулбал, АНУ-д 205 мянган хүн, Бразилд 141700, Энэтхэгт 95500 хүн нас барсан байна.  Коронавирусын хоёр дахь давалгаа долдугаар сард эхэлсэн ч наймдугаар сард халдварын тоо буурсан. Гэвч дахин өсөх хандлагатай байгааг анхаарууллаа. Анхны тохиолдол Уханьд бүртгэгдэснээс 10 сарын дотор дэлхий нэг сая гаруй хүнээ коронавирусын улмаас алдаж байгаа нь энэ юм.  АНУ-д 7.3 сая, Энэтхэгт 6.1 сая, Бразилд 4.7 сая, Орост 1.1 сая хүн халдвар авснаар тархалтаараа дэлхийд тэргүүлж байна.  ОХУ-д даваа гаригт 8135 тохиолдол бүртгэгдэж 20385 хүн нас баржээ.

Өнөөдрийн байдлаар дэлхийд 240 вакциныг туршиж байгаагаас ес нь сүүлийн шатны туршилтаа хийж байна. Эдгээрээс Оксфордын их сургуулийн хөгжүүлсэн вакцин үр нөлөө үзүүлж, Их Британи улс 100 сая тун вакцин захиалжээ.  Гэсэн ч ДЭМБ-аас ирэх оны дунд үе хүртэл дэлхий нийт коронавирусын эсрэг вакцинд хамрагдаж  чадахгүй хэмээн мэдэгдсэн билээ.

Эх сурвалж:BBC