Б.ДОЛЖИНЖАВ

Луйврын сонгуулийг эсэргүүцсэн жагсаал Беларусьт  50 дахь өдрөө үргэлжилж байна. Тухайлбал, Ерөнхийлөгчийн сонгуульд Александр Лукашенкогийн эсрэг өрсөлдсөн сөрөг хүчний нэр дэвшигч Светлана Тихановскаяаг дэмжигч 10 мянга орчим хүн өчигдөр Минск хотод жагсжээ. Беларусийг 1994 оноос хойш удирдаж байгаа Ерөнхийлөгч Лукашенког нууцаар тангарах өргөснийг эсэргүүцсэн энэ жагсаалын үеэр 200 хүнийг баривчилсан байна. Мөн Беларусийн хоёр дахь том хот Гомельд цагдаа нар нулимс асгаруулагч ашигласан бол Могилев хотын жагсаалын үеэр гранат ашиглажээ.

Сонгуулиас хойш өрнөсөн эсэргүүцлийн жагсаал хүрээгээ тэлсээр зарим долоо хоногт 100 мянга гаруй хүн жагсаж байсан билээ. Сөрөг хүчнээс нэр дэвшигч Светлана Тихановскаяагийн зургийг барьсан тэмцэгч “Бид ерөнхийлөгчөөрөө түүнийг сонгосон” хэмээн ярьсан бол өөр нэг жагсагч “Бид хорих лагерьт амьдрахыг хүсэхгүй байна” гэж ярьжээ. Жагсаалын өмнө Минск хотын төв талбайд олон төрлийн хуягт машин, усан буу байрлуулж, метроны хэд хэдэн зогсоолыг хааж, Лукашенкогийн суудаг Тусгаар тогтнолын ордныг цагдаа нар хамгаалалтдаа авсан байна.

Эх сурвалж:Moscow Times