Б.ОЮУНЗУЛ

Энэ удаа Polit-ийн онцлох сурвалжлагаар Төрийн шагналт, Соёлын гавьяат зүтгэлтэн, яруу найрагч С.Оюуныг онцоллоо.

"Хорвоод ганцхан ээждээ" тоглолтоороо үзэгч түмнийхээ сонорыг мялаах гэж байгаа түүний амьдрал өглөөний нартай уралдан босохоос эхэлдэг. Тэрээр эртэч нэгэн тул өдөр бүр өглөө 05:00 цагт босдог. Эрт сэрсэн хүн нэгийг үзнэ гэдэг үнэн үг бий гэж С.Оюун гуай хэлж байсан. Өглөөний эртэд тархиа сэргэг байгаа дээр бичиг цаасныхаа ажлыг амжуулж, 11:00 гэхэд өөрийнхөө уншиж бичиж судалж байсан бүх ажлаа дуусгаад сайн эмээгийн үүргээ гүйцэтгэхээр өдрийн ажилдаа шамдан орно. Сүүлийн өдрүүдэд түүний энгийн үргэлжилдэг өдрүүд арай өөр хэв маягтай болжээ. Төрүүлж өсгөсөн аав ээж, өндөр дээд шагналаа хайрласан төрдөө баярлаж Төрийн шагналдаа хүндэтгэл үзүүлэх тоглолтоо хийх гэж байгаа болохоор эртлэн босч бэлтгэл ажилдаа яаран явдаг. Түүнийг бичсэн ном, зохиосон дууны үгээр нь сайн мэднэ. Тэрээр уран бүтээлийнхээ гарааг “Мөнгөн шөнө” дуугаар эхэлж байжээ. Харин хоёр дахь дуу болох "Хорвоод ганцхан ээж дээ" дуугаа ээжийнхээ дурсгалд зориулан бичжээ. Дууны үг, утга санаагаа эргэн тойрныхоо бүх зүйлээс олдог гэж байлаа. С.Оюун гуай “Тухайн хүний онгод нь орох л юм бол нэг үгнээс ч санаа авдаг. Тэр үгнээс бүхэл бүтэн дуу бий болох ч тохиолдол байдаг. Хүнд ухаарлыг заавал загнаж хэлдэг юм биш. Уярал хайр, нигүүслийг бүх зүйлээс өгч болно. Бүр дуугаар ч өгч болно” гэв.

Монгол түмэн минь дуунд дуртай болохоор ямар нэг зүйлийг дуугаар дамжуулан ойлгох нь их. Тиймээс ухаарлын түлхүүрийг атгаж яваа зохиолчоор бахархууштай. Түүний уран бүтээлийн сан их арвин. Дан ганц хөгжмийн зохиолч биш роман, зохиол, дуурийн дуулалт жүжгийг ч бичиж байжээ. Одоо тэрээр Цогт тайжийн талаар судалгаа хийж байгаа. Удахгүй судалгааны ажлаа дуусган уншигч түмэндээ номын дээжээ өргөн барина гэж байв. С.Оюун гуайн олон сайхан дуу бий. Тэрээр “Харанга” хамтлагийнхан “Алдрын од” авахтай зэрэгцэн "Үгүйлэн санана даа" дуугаараа Төрийн шагнал хүртсэн байна. Тоглолтод олон алдартай дуучин ирэхээс гадна “Харанга” хамтлаг "Үгүйлэн санана даа" дуугаа дуулах юм байна. "Мөнгөн шөнө"-ийн эзэд ч ирж ая дуугаа өргөх ажээ. Төрийн шагналаа хүндэтгэх тоглолт нь амжилттай болохыг С.Оюун гуайдаа хүсэн ерөөе.

Эх сурвалж www.polit.mn