Б.ОД

Санхүүгийн зохицуулах хороо, “Нээлттэй нийгэм форум” хамтарч “Хувьцаат компанийн комплайнс, мэдээллийн ил тод байдал” сэдвээр хэлэлцүүлэг зохион байгуулж байна. Хэлэлцүүлгийн үеэр СЗХ-ноос хувьцаат компанийн засаглалыг нэвтрүүлэх чиглэлээр хэрэгжүүлж буй бодлого, зохицуулалтын шинэчлэл, хувьцаат компаниудын хууль тогтоомж, дүрэм, журмаар хүлээсэн үүргийн нийцэл, компанийн засаглал, мэдээллийн ил тод байдлын талаар мэдээлэл, цаашид хэрэгжүүлэх бодлого, шийдвэрийг танилцууллаа. Энэ талаар Санхүүгийн зохицуулах хорооны Үнэт Цаасны газрын дарга С.Цэрэндаш “Бид хувьцаат компанийн засаглалтай холбоотой чухал асуудлыг хэлэлцэж байна. Хөрөнгийн зах зээл дээрх гол бүтээгдэхүүн болох хувьцаа чанартай, хөрөнгө оруулагчдын итгэл даах хэмжээнд байснаар төдийчинээ ашигтай ажиллана. Иргэдийн хувьд банкны тогтолцооны талаар мэдлэг, мэдээлэлтэй ч хөрөнгийн зах дээрх хувьцаа, Засгийн газрын бондын талаар мэдлэг дутмаг байдаг. Тиймээс СЗХ олон нийтэд боловсрол, мэдээлэл олгох сургалтын хөтөлбөрийг шат дараатайгаар хэрэгжүүлэн ажиллаж байна. Гэхдээ   лекц уншиж, сургалт явуулаад олон нийтэд мэдлэг олгоно гэдэг өрөөсгөл ойлголт. Харин энгийн бүтэцтэй бүтээгдэхүүнээр дамжуулан иргэд арилжаанд оролцсоноор хөрөнгө оруулалтын өгөөж хүртэх, эрсдэлийг таньж мэдэх боломжтой” гэж ярилаа.

Эх сурвалж:www.polit.mn