Б.ОД

“Нар Мон” компанийн удирдлагууд тус компанийн эзэмшиж байсан газрыг “Тавантолгой түлш” компанид шилжүүлэх мэдэгдлийг хүлээн авах боломжгүй талаараа өчигдөр мэдээлэл хийсэн. Энэ асуудалд Нийслэлийн Газар зохион байгуулалтын албанаас өнөөдөр тайлбар өглөө. Нийслэлийн Газар зохион байгуулалтын албаны дэд дарга М.Шижирбаяр “Баянзүрх дүүргийн Засаг даргын 2011 оны 576 дугаар захирамжаар тус дүүргийн X хороонд “Нар Мон” компанид 2.7 га газрыг аж ахуйн зориулалтаар таван жилийн хугацаатайгаар эзэмшүүлэхээр шийдвэрлэсэн. Дараа нь 2018 онд газар эзэмших хугацааг 15 жил болгож сунгасан. Ингэхдээ газрын хэмжээг 6.5 га болгон нэмэгдүүлсэн. Гэвч тус компани гэрээнд заасан газрын төлбөрөө хугацаанд нь төлөөгүй учраас газар эзэмших эрхийн гэрчилгээг энэ оны  дөрөвдүгээр сарын 13-нд хүчингүй болгосон. Тодруулбал, Газрын тухай хуулийн 7.1 дүгээр заалтыг зөрчин 2018,2019, 2020 оны дөрөвдүгээр сарын 13-ныг хүртэлх газар ашигласны төлбөр болох 90 сая 213 мянга 929 төгрөгийг төлөөгүй. Мөн тухайн газрыг эзэмшихдээ төлдөг дуудлага худалдааны үнийг төлөөгүй.  Жилд 72 сая төгрөг төлөх ёстой. Гэтэл “Нар Мон” компани Нийслэлийн газар зохион байгуулалтын алба болон улсад нэг ч төгрөгийн төлбөр төлөөгүй. Удаа дараа мэдэгдэл хүргүүлсэн боловч бидний шаардлагыг хүлээж аваагүй. Газрын тухай хуулийн 40.1.5-т заасны дагуу дуудлага худалдааны анхны үнийг төлөөгүй, Газрын тухай хуулийн 61.1-т заасны дагуу жил бүр улсын газрыг ашигласны төлбөрөө төлөөгүй учраас газар эзэмших эрхийг цуцалсан” гэлээ.

“Нар Мон” компанийн газрын эрхийг цуцлаад “Тавантолгой түлш” компанид сайжруулсан түлш борлуулах үйлдвэр, агуулахын зориулалтаар 15 жилийн хугацаатайгаар 22.6 га газар эзэмших эрхийг энэ оны дөрөвдүгээр сарын 13-нд олгожээ.

Эх сурвалж:www.polit.mn