Б.ДОЛЖИНЖАВ

Улсын Онцгой комисс (УОК)-ын Шуурхай штабаас өнөөдөр (2020.09.01) цаг үеийн асуудлаар мэдээлэл хийлээ. Шуурхай штабын дарга, хурандаа Б.Ууганбаяр “Өнөөдрийн байдлаар тусгаарлах 63 байранд 3231 иргэн байна. Үүнээс нийслэлд 2685, орон нутагт 546 иргэн тусгаарлалтад байна.  Өвөлжилтийн бэлэн байдал, шугам сүлжээний засвар үйлчилгээ хийх шаардлагатай холбоотойгоор  тусгаарлах байранд асуудал тулгарна.  Мөн хичээл сургууль эхэлсэн учир  Мичид зочид буудал, Багабаян дахь сувиллын газар  ажиллахааргүй болсон. Жаргалант, Сэнтий зочид буудлууд үйл ажиллагаагаа тодорхойгүй хугацаагаар зогсоосноос эхлээд тусгаарлах байрны хүрэлцээтэй холбоотой хүндрэл бий болж байна” гэлээ. Энэ сард хийх нислэгийн талаар ГХЯ-ны Консулын газрын захирал Л.Мөнхтүшиг "Зарим тусгаарлах байранд өвөлжилтийн бэлтгэл ажил хангах засвар үйлчилгээ зайлшгүй хийх болсны улмаас есдүгээр сарын 9-нд Токио руу хийхээр төлөвлөж байсан тусгай үүргийн нислэгийг гурав хоног хойшлуулж, есдүгээр сарын 12-нд үйлдэгдэх болсныг албан ёсоор мэдэгдье. Энэ талаарх мэдээллийг Элчин сайдын яамаар дамжуулан Японд байгаа иргэдэд түгээж эхэлсэн. Шуурхай штабаас тусгаарлах байрны  тоог нэмэхээр ажиллаж байгаа. Ойрын хугацаанд ОХУ-аас ирэх хүсэлтэй болон БНХАУ-аас буцах хүсэлтэй цөөн тооны иргэдийг хилээр нэвтрүүлэх товыг удахгүй зарлана" гэв.

Эх  сурвалж:www.polit.mn