Б.ДОЛЖИНЖАВ

ЭМЯ-наас коронавирусын нөхцөл байдалтай холбоотой ээлжит мэдээллээ хийлээ. Манай улс өчигдөр 678 хүнд шинжилгээ хийхэд халдвар илрээгүй. Батлагдсан 301 тохиолдлоос 295 буюу 98 хувь нь эдгэрсэн. Эдгэрсэн хүмүүсээс 29 хүн сувилалын ажиглалтад, 40 хүн гэрийн ажиглалтад байгаа бол 226 хүний ажиглалт тандалтын хугацаа дууссан. ХӨСҮТ-д өнөөдрийн байдлаар зургаан хүн эмчлүүлж байгаагаас бүгдийнх нь  биеийн байдал хөнгөн байна.

 Сүүлийн 24 цагийн хугацаанд дэлхийд 265 мянган хүн халдвар авч, 5000 гаруй хүн эндсэн байна. Тухайлбал, ОХУ-д 4980 хүн өвчилж 60 хүн нас барсан бол Японд  600 хүн халдвар авч, 14 хүн амиа алджээ. Харин   БНХАУ-д 32 тохиолдол шинээр бүртгэгдсэний 17 нь гаднаас зөөвөрлөгдөн ирсэн тохиолдол байв. Энэ талаар ЭМЯ-ны хэлтсийн дарга Д.Нарангэрэл “Сүүлийн гурван хоногийн хугацаанд өвчлөл нэг саяар нэмэгдлээ. Коронавирусыг хяналтдаа аваад байсан Европ, Азийн хэдэн оронд өвчлөл дахин сэргэх хандлагатай байна. Хичээлийн шинэ жилтэй холбоотойгоор дэлхийн улс орнууд өөрийн онцлогт тохирсон арга хэмжээг авч байна. Нийтлэгээр анги дүүргэлтийг багасгах, амны хаалт зүүлгэх, гар угаах орчин бүрдүүлэх зэрэг эрүүл ахуйн арга хэмжээнээс гадна хүүхдийг зөв ханиаж, найтахад сургах, алсын зайнаас мэндэлж сургах, нийтийн тээврийн хэрэгслээр сургуульдаа очихгүй байх гэсэн зөвлөмжүүдийг өгч хэрэгжүүлж эхэлж байна. Мөн нэг анхаарах зүйл нь “Ковид 19”-тэй холбоотойгоор хүүхдэд сэтгэл зүйн ачаалал, дарамт өгөхгүйгээр энэ хичээлийн жилийг дуусгах арга хэмжээ авах шаардлагатай байна” гэв.

Эх сурвалж:www.polit.mn