Б.НАМУУНТАМИР

Хичээлийн шинэ жилийн бэлтгэл ажлын хүрээнд нийслэлийн бүх шатны сургалтын байгууллагын боловсрол, эрүүл ахуй, хүнсний чанар стандартад хяналт шалгалт хийж буй талаараа НМХГ-аас мэдээлэл хийлээ.

Шалгалтад нийслэлийн хэмжээнд нийт 938 боловсролын байгууллага хамрагдах бөгөөд энэ сарын 26-ны байдлаар 501 буюу 55.8 хувьд нь хяналт шалгалт хийсэн байна.

НМХГ-ын Эрүүл мэнд, боловсрол соёлын хяналтын хэлтсийн дарга Д.Цэнд-Аюуш “Шалгалтын явцад нийт 717 зөрчил илрүүлснээс 120 зөрчлийг газар дээр нь арилгуулсан. Мөн улсын байцаагчийн 12 албан шаардлага хүргүүлж, 10 хуулийн этгээдэд Зөрчлийн тухай хуулийн дагуу шийтгэл ногдуулсан. Урьдчилан сэргийлэх хяналт шалгалт нь аравдугаар сарын 1-нийг хүртэл үргэлжилнэ" гэв.

Бүх боловсролын байгууллага халдвараас урьдчилан сэргийлэх чиглэлээр төлөвлөгөө гаргаж ажиллах ёстой

НМХГ-ын Боловсролын хяналтын улсын байцаагч С.Лхагвадулам "Бүх шатны боловсролын байгууллага коронавирусын халдвараас урьдчилан сэргийлэх чиглэлээр төлөвлөгөө гаргаж ажиллах ёстой. Гэтэл зарим сургалтын байгууллага төлөвлөгөө хөтөлбөр гаргаагүй, гамшгаас хамгаалах өндөржүүлсэн бэлэн байдлын үед зохих шаардлагыг хангаагүй байна" гэлээ.

Түүнчлэн гурван сургууль, нэг цэцэрлэгийн барилга сургалт явуулах стандартын шаардлага хангаагүй байгаа бол 26 сургууль, 56 цэцэрлэгийн боловсон хүчин дутагдалтай хэмээн үнэлэгджээ. Энэ жил сургуулийн анги танхим, хоолны газарт сандал хоорондын зайг 1.5 м байхаар, нэг ангид 20-иос илүүгүй хүүхэд, дотуур байрны нэг оронд ноогдох талбайн хэмжээг дөрвөн м.кв-аас багагүй мөн ор хоорондын зайг 1.5 м байх журмыг мөрдөж байгаа. Гэвч НХМГ-ын хяналт шалгалтаар 60 хувь нь тухайн журмын хэрэгжилтийг хангаагүй байгаа юм байна.

Эх сурвалж: www.polit.mn