Б.ДОЛЖИНЖАВ

БШУЯ-ны Ерөнхий боловсролын бодлогын газрын дарга Т.Ням-Очир ЭМЯ-ны ээлжит хэвлэлийн хуралд оролцож, мэдээлэл хийлээ. Энэ үеэр зарим зүйлийг тодрууллаа.

-Энэ жил сургуулийн элсэлтийг цахимаар зохион байгуулж байгаа. Элсэлтийн явц ямар байна вэ?

Нийслэлийн есөн дүүрэг, 13 аймгийн 19900 багш өндөржүүлсэн бэлэн байдлын үед хичээл сургалтыг хэрхэн зохион байгуулах талаар сургалтад хамрагдсан. Энэ хичээлийн жилд нийслэл болон зургаан аймгийн 377 сургууль нэгдүгээр ангийн элсэлтийг цахимаар зохион байгуулж байна. Өнөөдрийн байдлаар орон нутгийн элсэлт 54, нийслэлийнх 60 хувьтай үргэлжилж байна.  Энэ сарын 28-нд элсэлтийн  бүртгэл дуусч, эцсийн дүн мэдээ гарна.

-Сургуулиуд сурагчдаа хүлээж авах бэлтгэл ажлаа хангачихсан уу?

Хорио цээрийн дэглэмтэй холбоотойгоор нийт сургуулийн 89 хувь нь 1-2 удаагийн ариутгал, халдваргүйжүүлэлт хийсэн. Есдүгээр сарын 1-н гэхэд гурав дахь удаагийн халдваргүйжүүлэлтийг хийж, хичээл эхлэх бэлэн байдлыг хангана. Нийт 2160 гар угаалтуурыг ерөнхий боловсролын сургуулиудад нэмж байршуулсан. Нэг угаалтуурт ногдох хүүхдийн тоо 46 байна. Цаашид гар угаалтуурын тоог нэмэгдүүлнэ. Сурах бичгийг сургуулиудад хуваарилах ажил 75 хувийн гүйцэтгэлтэй  явж байна.

-Хичээлийн шинэ жилийн нээлтийн арга хэмжээг хэрхэн зохион байгуулах вэ?

-БШУЯ-ны Төрийн нарийн бичгийн даргын зөвлөмжийг сургуулиудад хүргүүлсэн. Хуучин уламжлалт нээлтийн арга хэмжээг зохион байгуулахгүй. Есдүгээр сарын 1-ний өглөөнөөс хичээл сургалтын үйл ажиллагаа эхэлнэ. Харин хичээл эхлэхээс өмнө тухайн сургууль хичээлийн жилийн онцлог, шинэ багш нарын талаар эсвэл ахмад багш нарынхаа сургаалийг видео хэлбэрээр бэлтгэж хүргэж болно.

- Сурагчдын дүрэмт хувцасны загвар өөрчлөгдсөн юм уу?

-Сурагчид 2013 оноос хойш өмсөж байгаа нэгдсэн загварын дүрэмт хувцсаа өмсөнө. Дүрэмт хувцасны үнэ нэмэгдээгүй. Хүүхдэд ялгаатай байдал үүсгэхгүйгээр дүрэмт хувцсаараа жигдэрнэ. Улсын хэмжээнд давхардсан тоогоор 66 компани 140 цэгээр дамжуулан дүрэмт хувцасыг борлуулж байгаа.

-Багш нарын сул орон тооны талаар мэдээлсэн. Яг ямар хичээлийн багш эрэлттэй байгаа вэ?

Багшийн сул орон тооны мэдээллийг зургаадугаар сард нэгтгэсэн. Одоогийн байдлаар 3069 багшийн сул орон тоо байгаа. Үүнд сонгон шалгаруулалт хийж байна. Хамгийн эрэлттэй нь бага ангийн багш дараа нь математик, гадаад хэл, хөгжим, хими, биологийн багш орж байна.

Эх сурвалж:www.polit.mn