Б.ДОЛЖИНЖАВ

ЭМЯ-наас коронавирусын тархалттай холбоотой ээлжит мэдээллээ хийлээ. Манай улс пүрэв гаригт 709 хүнд шинжилгээ хийхэд халдвар илрээгүй. Харин өнөөдөр хоёр хүн эдгэрч ХӨСҮТ-өөс гарлаа. Эдгэрсэн хоёр иргэний нэг нь 42 настай эрэгтэй нөгөө нь 50 настай эмэгтэй байна. Батлагдсан 298 тохиолдлоос 283 нь эдгэрсэн.  ХӨСҮТ-д 15 хүн эмчлүүлж байгаагаас 13 өвчтөний биеийн байдал хөнгөн, хоёр хүний биеийн байдал хүндэвтэр байна. Эдгэрсэн хүмүүсээс 28 хүн сувилалд, 38 хүн гэрийн ажиглалтад тусгаарлагдаж байгаа бол 217 хүний ажиглалт, тандалтын хугацаа дууссан. Цэргийн төв эмнэлэгт тусгай үүргийн онгоцоор ирсэн 52 хүн эмчлүүлж байгаагаас гурван хүн эрчимт эмчилгээний тасагт биеийн байдал нь хүндэвтэр байна. 

Дэлхийд сүүлийн 24 цагийн хугацаанд 239 мянган хүн халдвар авч 5000 гаруй хүн нас баржээ. Тухайлбал, ОХУ-д 4785 хүн халдвар авч, 115 хүн эндсэн байна. Харин   БНХАУ-д 40 тохиолдол шинээр бүртгэгдсэн бол Японд 1195 хүн халдвар авч 11 хүн нас баржээ.  Япон улсын нийт  халдвар авсан хүмүүсийн 54 хувийг 20-30 насны залуучууд эзэлж байна. Иймээс архи согтууруулах ундаагаар үйлчилдэг газруудын ажлын цагийг богиносгох арга хэмжээ авчээ. Энэ талаар ЭМЯ-ны хэлтсийн дарга Д.Нарангэрэл "Европын улсуудад хязгаарлалтын дэглэмийг бууруулснаас хойш өдөрт дунджаар 26 мянган тохиолдол бүртгэгдэж эхэлсэн. Тохиолдлын тоо ийнхүү огцом өссөн нь дэглэмийг бууруулсан, иргэд тайвширч, маскаа зүүгээгүй, хүн хоорондын зайгаа бариагүй, гараа сайн угаагаагүйгээс болсныг ДЭМБ мэдээлсэн.  Түүнчлэн 20-40 насныхан их өвчилж, халдвар тарааж байгааг анхааруулсан” гэлээ. 

        Эх сурвалж:www.polit.mn