Б.ОД

Газрын зөрчилтэй холбоотой иргэдийн гомдол, цахим дуудлага худалдааны талаар Нийслэлийн Газар зохион байгуулалтын албанаас өнөөдөр мэдээлэл хийлээ. Нийслэлийн Газар зохион байгуулалтын албаны орлогч дарга М.Шижирбаяр “Энэ сарын 16-ны байдлаар Газар зохион байгуулалтын албанд иргэн, аж ахуйн нэгжээс нийт 35193 албан бичиг, өргөдөл гомдол ирсэн. Үүнээс 32191 албан бичгийг шийдвэрлэж, 299 өргөдлийг судалж  байна. Иргэдээс ирсэн нийт өргөдөл гомдлын 98.6 хувь нь шийдвэрлэгдсэн” гэлээ. Энэ оны эхний хагас жилд газар чөлөөлөх, газрын зөрчил арилгах, орчны аюулгүй байдлыг хангах чиглэлээр 151 байршилд, 437 объект чөлөөлөх төлөвлөгөөтэйгээр ажиллажээ. Энэ талаар Газар ашиглалт, бүртгэлийн хэлтсийн дарга Д.Бат-Өлзий “Өнөөдрийн байдлаар 139 байршилд 400 гаруй объектыг чөлөөлсөн. 30 байршилд явган хүний замын  орц, гарцыг нээж,  55 байршилд нийтийн эзэмшлийн зам талбайн хүрэлцээ хангамжийг нэмэгдүүлж, ногоон байгууламж хийх боломжтой талбайн газрыг чөлөөлсөн.  Эдгээр газрыг чөлөөлснөөр 20 байршилд автомашин, явган хүний зам болон зогсоол байгуулах боломжтой сул талбайтай болж байна. 10 мянга орчим метр квадрат талбай нийтийн эзэмшилд шилжиж, 4100 орчим метр.кв явган хүний замын газар чөлөөлөгдсөн. Мөн бид 82 байршилд 439 объектыг чөлөөлөх нэмэлт төлөвлөгөө гаргаад ажиллаж байна” гэв.

Харин цахим дуудлага худалдааны талаар Газрын менежмент, төлөвлөлтийн хэлтсийн дарга Б.Оюунчимэг “Энэ сарын 19-ний 09:00-17:00 цагийн хооронд 24 байршилд цахим хэлбэрээр дуудлага худалдааг амжилттай зохион байгуулсан. Нийт 90 байршилд дуудлага худалдаа хийхээр ажиллаж байна. Одоогийн байдлаар 71 байршилд дуудлага худалдаа явуулсны 29 байршилд ялагч тодорсон. Ирэх сарын 16-ны өдөр 10 байршилд дуудлага худалдаа зохион байгуулахаар бэлтгэл ханган ажиллаж байна” гэлээ.

Эх сурвалж:www.polit.mn