Б.ДОЛЖИНЖАВ

Австрали улсын эм үйлдвэрлэгч “AstraZeneca” компанийн  туршиж байгаа “Ковид-19”-ийн эсрэг вакцинд бүх хүн амаа үнэгүй хамруулна гэдгийг Засгийн газар нь зарлалаа. Тус компани Оксфордын их сургуультай хамтран энэ вакцинаа бүтээж байгаа бөгөөд хэд хэдэн орны олон мянган сайн дурын ажилтныг туршилтдаа хамруулаад байгаа юм. Энэ талаар Ерөнхий сайд Скотт  Моррисон “Оксфордын их сургуулийн энэ  вакцин бол дэлхийн хамгийн амжилттай яваа вакцины нэг. Тиймээс  вакцинаа үйлдвэрлэж эхэлвэл 25 сая Австрали хүнээ үнэ  төлбөргүй хамруулна. Гэхдээ бусад орны вакцинуудаас түрүүлж амжилттай болно гэх баталгаа байхгүй учир судлаачид болон  бусад улс орны вакцин бүтээгчидтэй  үргэлжлүүлэн хамтран ажиллаж байна” гэж  ярьжээ.

Өнгөрсөн сарын сүүлээр вакцины I, II шатны туршилт дуусч аюулгүй, хүний биед дархлаа тогтоож байгаа талаар “AstraZeneca” зарласан. Харин III шатны туршилтаар вакцин коронавирусаас хүмүүсийг хамгаална гэдгийг батлах ёстой. Энэ жилийн сүүл гэхэд вакцин бэлэн болно хэмээн  таамаглаж байна. Тус үйлдвэр гурван тэрбум тун вакцин үйлдвэрлэж олон нийтэд худалдаална хэмээн Засгийн газар болон бусад олон байгууллагатай  аль хэдийнэ гэрээ байгуулжээ. АНУ тус компаниас аравдугаар сарын эхээр 300 сая тун вакцин авах захиалгаа өгчээ.  Мөн ОХУ, Өмнөд Солонгос, Япон, Хятад, Бразил улс вакцины захиалга өгсөн байна.  Түүнчлэн Европын холбоо бүх гишүүн орондоо зориулан 400 сая тун вакцин авна хэмээн мэдэгджээ. “Бид вакциныхаа эхний тунг энэ оны сүүл гэхэд хүлээн авч, маш хурдан, олон оронд тэр дундаа Европын холбооны орнууддаа өгнө гэдэгт итгэлтэй байна” гэж “AstraZeneca”-гийн гүйцэтгэх захирал Паскал Сориот өнгөрсөн долоо хоногт болсон Европын холбооны хурлын үеэр хэлжээ.

Австралийн Викториа мужийн нийслэл Мельбурн хотод тархалт дэгдэж энэ сарын 2-ноос дахин хөл хорио тогтоосон. Зургаан долоо хоног сургуулиуд цахимаар хичээллэж, иргэд гэрээсээ хол  хамгийн ихдээ таван километр явж болно. “Викториа мужийн хоёр дахь давалгааны 99 хувь нь Мельбурнийн зочид буудлуудад тусгаарлагдаж байсан хүмүүс” гэж Эрүүл мэндийн төвийн судлаач Чарлес Алпрен ярьжээ.  Тус улсын анхны  тохиолдол гадаадаас тавдугаар сарын 9-нд ирээд зочид буудалд тусгаарлагдаж байсан нэг гэр бүлийн хоёр хүн байсан. Долоо хоногийн дараа зочид буудлын гурван ажилтан, сарын дараа 17 хүн тус зочид буудлаас халдвар авсан юм. Долдугаар сарын 29 гэхэд уг зочид буудлаас 817 хүн халдвар авсныг Эрүүл мэндийн газар мэдээлсэн. Тиймээс Австрали хилээ хааж, иргэдийг гэртээ байхыг зөвлөлөө. Өнөөдрийн байдлаар Австралид 23 мянга гаруй хүн халдвар авч 450 хүн нас барсан байна.

Эх сурвалж:CNN