С.САРУУЛ

Эрүүл мэндийн яам өнөөдөр /2020.7.26/ Covid-19-т коронавируст халдварын нөхцөл байдлын талаар мэдээлэл хийлээ. “Covid-19-т халдвар дэлхийн 216 улс оронд бүртгэгдэж, 15 сая 918 мянган хүн халдвар авч, 645 мянга гаруй хүн нас бараад байна. Одоогоор 9.8 сая гаруй хүн эдгэрчээ. Сүүлийн 24 цагт 284 мянган хүн шинээр өвчилж, 6000 гаруй хүн нас баржээ. ХӨСҮТ-ийн Тандалт, шуурхай удирдлагын хэлтсийн дарга Д.Нарангэрэл “Энэ нь шинэ тохиолдол хамгийн өндөр байгаа хоёр дахь өдөр байлаа. Эрдэмтэд халдвар буурахгүй байгааг хөл хориог огцом сулруулсантай холбоотой гэж үзэж байна. Мөн буруу ташаа мэдээлэлд автах, залуучуудын хайхрамжгүй байдал зэрэг нь халдвар буурахгүй байгаад нөлөөлж байгаа гэж үзэж байна. Германы мах боловсруулах үйлдвэрт хийсэн судалгаагаар хүйтэн, сэрүүн, агааргүй үед “Covid-19” нь найман метрт халдвар тархах эрсдэлтэй гэж үзжээ. ДЭМБ-аас дархлаажуулалт зэрэг бусад эрүүл мэндийн үйлчилгээг орхигдуулж болохгүйг анхааруулсан” гэв.

Монгол Улсад өчигдөр /2020.07.25/ 210 хүн ажиглалтад орж, 218 хүн ажиглалтаас гарлаа. Одоогоор 2566 хүн ажиглалтад байгаа бөгөөд эдгээр хүмүүст 182 төрийн албан хаагч үйлчилж байна. Цэргийн төв эмнэлэгт 39 хүн хэвтэн эмчлүүлж байна. Сүүлийн 24 цагт 119 тусгай утсанд 124 хүн холбогдож “Covid-19”-т халдварын талаар зөвлөгөө, мэдээлэл авчээ. Эдгэрч сувилалд шилжээд байсан 23 хүнд шинжилгээ хийхэд эерэг гарч, хяналтад авсан талаар бид өмнө нь дурдсан. Эдгээр хүмүүсийн 11-д нь гурав дахь шинжилгээгээр вирус илрээгүй тул гэрийн тусгаарлалтад шилжүүллээ.

АНУ-д нийт халдвар 4.9 сая, нас баралт 1455 мянгад хүрчээ. Бразилд нийт халдвартай хүний 1.6 сая нь эдгэрсэн бол 86 мянга 400 хүн энджээ. Энэтхэгт өчигдөр /2020.07.25/ 48 мянга 600 шинэ тохиолдол бүртгэгдэж нийт халвар 1.6 сая-д хүрчээ. ОХУ-д өчигдөр 5871 шинэ тохиолдол бүртгэгдэж, БНСУ-д 58 тохиолдол шинээр бүртгэгджээ. Үүний 46 нь дотоодын халдвар байсан байна. Японд 804 шинэ тохиолдол бүртгэгдлээ. Үүний 297 нь Токиод бүртгэгджээ. БНХАУ-д 46 шинэ тохиолдол бүртгэгджээ. Үүний 11 нь гаднаас зөөвөрлөгдсөн байна.

Эх сурвалж: www.polit.mn