Б.ДОЛЖИНЖАВ

Дэлхий нийтийг хамарсан хөл хорионы улмаас хил хаагдаж, олон хүн дэлхийн хамгийн алдартай газруудаар аялж чадахгүйд хүрээд байна. Гэвч үзэсгэлэнт сайхан байгалиараа алдартай Мальдив улс жуулчдаа хүлээж авч эхэлж буйгаа энэ сарын 15-нд мэдэгдлээ. Тус улсын нийслэл Мале хотын Велана олон улсын нисэх буудалд очсон жуулчин хорио цээрийн дэглэмийг нарийн баримтлах шаардлагагүй. Тэр байтугай коронавирусын шинжилгээ ч хийлгэсэн ч байх албагүй юм. Мөн визний шинэ шаардлага, нэмэлт төлбөр шаардахгүй.  Харин  Мальдивд буусны дараа эрүүл мэндийн мэдүүлэг бөглүүлж, 30 хоногийн жуулчны виз олгоно. Амарч байх үед “ковид-19”-ийн шинж тэмдэг илрэх юм бол аялагч өөрийн зардлаар тусгаарлах байранд тусгаарлагдана.

 Мальдив бол 1000 гаруй амралтын аралтай, 90 мянган квадрат талбайтай, арлын ихэнх нь аялал жуулчлалын чиглэлээр хөгжсөн үзэсгэлэнт байгальтай улс юм. Мальдивын аялал жуулчлалын 47 жилийн түүхэнд анх удаа гуравдугаар сараас хойш нэг ч жуулчин хүлээж аваагүй тохиолдол нь энэ юм. Хилээ нээсэн хэдий ч цар тахлын улмаас тус арлын жуулчдын тоо 70-75 хувиар буурах хандлагатай байна. Яг одоо Мальдив руу нисэх боломжтой бөгөөд Ойрхи Дорнодоор дамжин хэд хэдэн нисэх онгоц нислэг үйлдэж байна. Үүнд Сидней, Торонто, Чикаго, Лондон зэрэг хотоос Дубайгаар дамжин нисэхийг “Эмират Айрлайнес” компани санал болгож байна. Мөн “Qatar Airways” компани Нью Йорк, Лондон, Парис, Сидней, Франкфуртээс Доха руу дамжин Мальдив руу нисэхийг энэ сарын 15-наас  зөвшөөрлөө. Мөн Арабын нэгдсэн Эмират улсын “Etihad” компани энэ сарын 16-наас Абу Дабигаас Мальдив руу нисэх нислэгээ нээлээ. Харин “Turkish Airlines” 17-нд нислэгээ эхлүүлнэ.

Эх сурвалж: CNN