Б.Туул

Орон нутагт тарваган тахал гарч, хүний амь нас хохирсонтой холбогдуулан Нийслэлийн онцгой байдлын газар, Зоонозын өвчин судлалын үндэсний төв, Цагдаагийн ерөнхий газрын Экологийн цагдаагийн алба, Нийслэлийн мэргэжлийн хяналтын газраас өнөөдөр /2020.07.20/ мэдээлэл хийлээ.  Онцгой байдлын газраас өдөр бүр өглөөний 09:00-21:00 цаг хүртэл гол дагуу завьт эргүүл ажиллуулж, эрэн хайх аврах ажиллагааг явуулж байгаа аж. Мөн хэд хоногийн өмнө Хэрлэн голд 11 настай хүүхэд осолдсон бөгөөд хүүхдийн эцэг эхийн хүсэлтээр эрэн хайх ажиллагааг үргэлжлүүлж байна. Иймд, амралт зугаалгаар явж буй иргэд хүүхдэдээ анхаарах шаардлагатай байгааг санууллаа. Түүнчлэн цагдаагийн байгууллага, онцгой байдлын газар, мэргэжлийн хяналтын газраас нийслэлд тарваган тахал гарахаас сэргийлэх зорилгоор, автотээврийн шалган нэвтрүүлэх цэгүүдэд хяналт шалгалт хийж байна. Энэ оны эхний хагас жилийн байдлаар 109 нойтон тарвага тээвэрлэж явсан зөрчлийг илрүүлэн Зоонозын өвчин судлалын үндэсний төвд шилжүүлжээ. Мөн сүүлийн үед нойтон тарвага, түүний эд эрхтэнийг нийслэл, суурин руу тээвэрлэх зөрчил тасралтгүй гарч байгаа учраас хяналт, шалгалтыг чангаруулаад байна. Судалгаагаар манай орны 130 орчим суманд тарваган тахлын голомт байдаг бөгөөд энэ жилийн хувьд тахлын идэвхжил өндөр байгаа учир иргэд эрүүл мэндээ эрсдэлд оруулахгүй байхыг албаныхан анхааруулж байна.

Эх сурвалж: www.polit.mn