Ч.ОЛДОХ

Оюутолгойн болон “Дубайн гэрээ”-тэй холбоотой  Ерөнхий сайд асан С.Баяр нарын  хэрэгт хамт шүүгдэж буй  Б.Бямбасайханы өмгөөлөгч Н.Цогт  өнөөдөр 12:30 цагт Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн гадна хэвлэлийнхэнд хандаж мэдээлэл хийнэ.  Тэрээр шүүх хурлын явцын тухайд  "Ерөнхий сайд асан Ч.Сайханбилэгийг энэ хуралд оролцуулахгүйгээр хамжигч гэж хэдэн хүн авчраад шүүх хурал хийх нь учир дутагдалтай байна. Миний үйлчлүүлэгч Б.Бямбасайхан УИХ, Засгийн газраар дэмжиж, батлагдсан гэрээг биелүүлж,  ажлаа хийсэн хүн" гэсэн байр суурийг илэрхийлж байгаа юм.

Б.Бямбасайхан нь “Эрдэнэс Монгол” ХХК-ийн гүйцэтгэх захирлаар ажиллаж байхдаа, “Эрдэнэс Оюутолгой” ХХК-ийн гүйцэтгэх захирал Д.Ганболдын хамтаар  Монгол Улсын Ерөнхий сайдын 2015 оны дөрөвдүгээр сарын 16-ны өдрийн 99 дүгээр захирамжийг биелүүлж  “Оюутолгой” төслийн далд уурхайн бүтээн байгуулалтын санхүүжилтийн төлөвлөгөөнд гарын үсэг зурсан гэсэн үндэслэлээр шүүгдэж байна. Тэгвэл дээрх 99 дүгээр захирамжийг хууль бус болохыг тогтоолгохоор гомдол гаргасан  “ДМ” нэгдлийн  нэхэмжлэлийг анхан шатны  шүүх  хангаж шийдвэрлэсэн байдаг.

Эх сурвалж: www.polit.mn