А.МАРАЛМАА

Дэлхийн аялал жуулчлалын салбар эко туризм буюу хүрээлэн буй орчинд ээлтэй аяллын хэв маяг зонхилох болсонтой холбогдуулан аялалд гарах гэж буй танд хэрэгтэй мэдээллийг хүргэж байна. Зөвхөн аялалд төдийгүй амьдралдаа хэвшүүлэх хэрэгтэй энэ зөвлөгөөнүүд танд тус болно гэдэгт итгэлтэй байна. 

Хулсан халбага, сэрээ

Хулсан халбага сэрээ нь авч явахад хөнгөн. Хулс маш хурдан ургадаг тул байгалийн нөхөн сэргээгдэх нөөц гэж үздэг. Мөн хөрсөнд задрах хугацаа богино байдаг байна. 

Ган соруул 

Кафе, түргэн хоолны газрууд нэмэгдэхийн хэрээр соруулын хэрэглээ ихсэж байна. Нэг удаа хэрэглээд хаях соруул хөрсөнд 500-гаас дээш жил задардаггүй нь харамсалтай. Харин ган соруул нь пластик соруулыг орлож чадах шилдэг бүтээгдэхүүн юм. Ган соруулыг дагалдаж ирэх сойзоор хүссэн үедээ цэвэрлэж, ашиглаж болно. 

Шахмал шампунь, ангижруулагч

Цэвэр байгалийн гаралтай шахмал шампунь, ангижруулагч пластик хаягдал гарахгүй давуу талтай. Авсаархан эдгээр бүтээгдэхүүнийг төмөр саванд хийгээд л хаана ч авч явсан болно.

 Хулсан сойз

Хулсан сойзны үсийг хулсны мяндсаар хийж, сайжруулсан нүүрс шингээж өгсөн болохоор хөрсөнд зургаан сарын дотор задардаг давуу талтай юм байна.

Оливын саван

Оливын саван нь маш минимал юм. Цэвэр оливын тосоор хийсэн энэ саван нь ямар нэгэн үнэртүүлэгч бодис ороогүй бөгөөд 100 хувь ургамлаас гаргаж авсан тул нүүр, бие, үс, хувцас гээд бүх төрлийн хэрэглээнд хэрэглэж болно. Оливын савантай байхад олон төрлийн бүтээгдэхүүнийг орлох юм.

Нарны тос 

Нарны тосоо өөрөө органик бүтээгдэхүүнээр хийж болно. Хүний арьсанд түрхэж буй ямар нэгэн тос нь хүн хоолноос авч буй элдэв хорт бодисоос 10 дахин хортой байдаг байна. Экстра вирджин, олив, коконатыг ашиглан нарны тос хийх боломжтой. Нарнаас хамгаалах витамин А-г луувангийн тосоор орлуулж хийдэг.

Даавуун тор 

Хүнс, хувцас, хог хаягдал гээд бүх зүйлээ хийх боломжтой даавуун тор аяллын маш чухал хэсэг байх болно. 

Хулсан ариун цэврийн 

Бидний өдөр тутамдаа хэрэглэдэг ариун цэврийн цааснуудыг их хэмжээний хлороор цайруулж цагаан өнгөтэй болгодог байна. Харин хулсан ариун цэврийн цаас нь байгальд, төдийгүй хүний биед сөрөг нөлөөгүйгээрээ давуу талтай. 

Аяны жорлон 

Хүний өтгөн шингэнээс ялгардаг метан агаар, хөрс болон хүний биед сөргөөр нөлөөлдөг учир аяны жорлон авч явахыг зөвлөж байна.  

Эх сурвалж Зууны мэдээ сонин 2020.7.17 № 136 (6361)