С.САРУУЛ

“COVID-19”-ийн нөхцөл байдлын талаар /2020.07.16/ Эрүүл мэндийн яамнаас ээлжит мэдээллээ өглөө. ХӨСҮТ-ийн захирал Д.Нямхүү "Долдугаар сарын 15-ны өдөр гурван лабораторид  184 хүний сорьцод шинжилгээ хийхэд бүгдэд нь коронавирус илрээгүй. Өнөөдөр хоёр хүн эдгэрч ХӨСҮТ-өөс гарч дараагийн шатны ажиглалт руу шилжиж байна. Нэг нь тавдугаар сарын 29-нд ОХУ-аас ирж, онош нь батлагдсан 20 настай оюутан эмэгтэй. Нөгөө нь 30 настай эмэгтэй бөгөөд Нур-Султан-Улаанбаатарын онгоцоор ирсэн хүн байна. Нийт батлагдсан тохиолдол 261-ээс 209 нь эдгэрсэн.  Эмчилгээнд байгаа 52 хүний 51 нь хөнгөн, нэг нь хүндэвтэр байгаа” гэв. Өчигдөр Сөүл-Улаанбаатарын онгоцоор ирсэн 428 хүнээс гурван иргэнийг эрдэлтэй гэж үзэж ХӨСҮТ-д тусгаарлаж сорьц цуглуулж байгаа аж. Өнөөдрийн байдлаар улсын хэмжээнд  3006 иргэн ажиглалтад байна. Тусгаарлах байранд шинээр 428 хүн орсон бол 268 хүн гэрийн ажиглалт руу шилжжээ. Мөн ЭМЯ-ны 24 цагийн 119 шуурхай утсанд иргэдээс нийт 128 дуудлага иржээ.  Халдварт өвчнөөс сэргийлэх зорилгоор орон нутгийн 17 чиглэлийн галт тэргэнд 9000 гаруй иргэнд тандалт судалгаа хийхэд сэжигтэй тохиолдол илрээгүй байна.

Долдугаар сар гарснаас хойш нийт таван удаагийн нислэгээр 700 орчим иргэн эх орондоо иржээ. Эдгээр иргэнийг тээвэрлэсэн агаарын 5 хөлөг, 39 тээврийн хэрэгсэл 1076 м.куб талбайд Зооноз өвчин судлалын үндэсний төвөөс ариутгал халдваргүйжүүлэлт хийсэн байна. Тус төвийнхөн өнгөрсөн хугацаанд  тусгай үүргийн онгоцоор ирсэн 14.847 иргэнд тусламж үзүүлж, ариутгал халдваргүйжүүлэлт хийсэн байна. Хүн бүр амны хаалтаа зүүж, гараа тогтмол угааж сонор сэрэмжээ алдахгүй байхыг албаныхан зөвлөлөө.

Эх сурвалж: www.polit.mn