Б.ДОЛЖИНЖАВ

Олон нийтийн газар, сүм хийд шашны байгууллагууд тэргүүтэй газруудын үйл ажиллагааг үе шаттай нээх болсон шийдвэрийг үндэслэн Монголын Бурхан шашинтны төв Гандантэгчэнлин хийд энэ сарын нэгнээс хэвийн ажиллаж эхэлсэн. Үүнтэй холбогдуулан Монголын Бурхан шашинтны төв Гандантэгчэнлин хийдээс өнөөдөр мэдээлэл хийлээ. МБШТөв Гандантэгчэнлин хийдийн Хэвлэл мэдээлэл, олон нийттэй харилцах албаны дарга Ж.Одгарьд “Улсын онцгой комиссын шийдвэрээр долдугаар сарын нэгнээс эхлэн Гандантэгчэнлин хийд шашны үйл ажиллагаагаа хэвийн явуулахаар боллоо . Иргэд сүсэгтэн олныг урьдын адилаар хүлээн авч, буян хураах, сайн үйлс үйлдэх, хүрээ хийддээ мөргөх боломж нөхцөлийг бүрдүүлж байна" гэсэн юм. 

Гандантэгчэнлин хийдийн захиргаа өчигдөр хуралдаж хэд хэдэн шийдвэр гаргажээ.  Тухайлбал, энэ сарын 4-9-ний хооронд 09:00-17:00 цаг хүртэл сүсэгтэн олонд цагаан сарын уншлага номыг хийх юм байна. Ингэхдээ "Батцагаан" Цогчэн дуганы үүдний танхимын баруун, зүүн хоёр жигүүрт сүсэгтэн олны айлтгал хүсэл бүгдийг хүлээж авна. "Батцагаан" Цогчэн дуганы дээд танхимд гол номоо хурна. Доод танхимын баруун зүүн жигүүрт сүсэгтэн олны айлтгал ном хурах аж.   Улсын онцгой комиссоос тавьсан шаардлагын дагуу, гар ариутгагч зэргийг бэлдэн зохион байгуулах тул иргэдийг амны хаалттайгаа ирэхийг санууллаа.

Эх сурвалж: www.polit.mn