Ж.МИШЭЭЛ

Улсын нэгдүгээр төв эмнэлгийн /УНТЭ/ урьдчилан сэргийлэх үзлэг оношилгооны иж бүрэн төв болох “Эрүүл мэндийг дэмжих төв” өнөөдөр нээлтээ хийлээ. Нээлтийн үйл ажиллагаанд Эрүүл мэндийн сайд Д.Сарангэрэл, УНТЭ-ийн ерөнхий захирал Т.Мөнхсайхан болон бусад албаныхан оролцлоо. “Иргэд энэ төвд хандсанаар урьдчилан сэргийлэх үзлэг, оношилгоонд цогцоор хамрагдаж, аливаа өвчлөлийг эрт илрүүлээд зогсохгүй, эрүүл зөв амьдрах зөвлөгөө, үйлчилгээг авах болно. Бид дөрвөн төрлийн тусгай багцын үйлчилгээг гаргасан бөгөөд үйлчлүүлэгч өөрт хэрэгтэй аль ч багцыг сонгож амралтын өдрүүдээр ч үйлчүүлэх боломжтой. Энэ төв нь тав тухтай үйлчилгээг олон улсын стандартад нийцүүлэн бүрэн хангасан” гэж УНТЭ-ийн ерөнхий захирал Т.Мөнхсайхан ярьж байсан.

Энэ төвд УНТЭ дээр хийдэг 10 гаруй төрлийн нарийн мэргэжлийн үзлэг, оношилгоог 20 орчим эмч, мэргэжилтэн хийж үйлчлэх юм байна. Эмч, мэргэжилтнүүд нь ахлахаас дээш зэрэгтэй, таваас илүү жил ажилласан туршлагатай хүмүүс байх ажээ. Эрүүл мэндийн сайд Д.Сарангэрэл “Эрүүл мэндийг дэмжих төв” нь олон улсын стандартад нийцсэн, сүүлийн үеийн тоног төхөөрөмжтэй. Бид гадаад улсад хийдэг эрүүл мэндийн бүрэн шинжилгээг эх орондоо хийлгэх боломж бүрдлээ” гэсэн юм. Эрүүл мэндийг дэмжих төвийг дэмжиж ЭМЯ-наас рентген болон эхо аппарат, зүрх, мэдрэлийн цахилгаан бичлэг, мониторын багаж төхөөрөмжийг өгсөн байна.

“Эрүүл мэндийг дэмжих төв”-ийн дарга анагаах ухааны доктор Э.Баясгалан “УНТЭ-ийн амбулаториор өдөрт 2500-3000 хүн үйлчлүүлдэг. Бид энэ төвийг ашиглалтад оруулснаар ачааллыг 10-15 хувь бууруулж өдөрт 120-130 хүнд үйлчлэх боломжтой байна” гэлээ. Энэ төвийг байгуулснаар УНТЭ санхүүгийн хувьд хагас бие даасан байдал руу шилжиж байна. Мөн орлого нь эмч, ажилчдын нийгмийн асуудлыг шийдвэрлэх, цалин урамшууллыг нэмэхэд зориулагдах юм байна.

Эх сурвалж: www.polit.mn