Т.САЙХАН

ЭМЯ-наас /06.19/ ээлжит мэдээллээ хийж, коронавирусын нөхцөл байдлыг танилцууллаа.

Коронавирус-Монголд

"Зургадугаар сарын 18-ны өдөр гурван лабораторид нийт 339 шинжилгээ хийхэд, 336 хүнй шинжилгээнд коронавирус илрээгүй. Харин Алтанбулаг боомтоор орж ирсэн гурван жолоочид халдвар илэрсэн. Жолооч нар ОХУ-ын 59 настай иргэн, Беларусийн 37 настай иргэн байгаа бол Монгол Улсын 32 настай нэг иргэн байна. Тэднийг өнөө өглөө ХӨСҮТ-ийн эмчилгээнд оруулж эхэллээ.Өчигдөр үүргийн нислэгээр ирсэн бүх хүмүүсийн сорьцыг цуглуулж, шинжилгээнд хамруулж амжлаа. Эхний шинжилгээгээр бүгдэд нь коронавирус илрээгүй.  Мөн өнөөдөр таван хүн эдгэрч ХӨСҮТ-өөс гарч байна. Нийт батлагдсан тохиолдол 204, эдгэрсэн 132 боллоо. Одоо 72 хүн эмчилгээнд байгаагийн 67 нь хөнгөн, тав нь хүндэвтэр байна. Эдгэрсэн таван хүн бүгд оюутан. Оюутнууд эмчийн өгсөн үүрэг даалгаврыг сайн биелүүлдэг. Эмч нарт сэтгэлийн их сайхан хүнч өгч байна" гэж ХӨСҮТ-ийн захирал Д.Нямхүү мэдээлэв. 

БНХАУ-ын нийслэл Бээжин хотод “COVID-19”-ийн халдварын шинэ тохиолдол буурсан байна. Дэгдэлтийг хяналтдаа авсан, халдварын шинэ тохиолдол ирэх өдрүүдэд ч буурна гэж албаныхан мэдэгдээд байна. Хэдий тийм боловч Бээжин хот хязгаарлалтын арга хэмжээгээ чангатгасаар байна. 

ОХУ-д “COVID-19”-ийн халдварын тохиолдол 7.7 мянгаар нэмэгджээ. ОХУ-д шинэ төрлийн “коронавирус”-ийн улмаас 7.6 мянган хүн эндсэнээс 500 нь эмнэлгийн ажилтан байна.

Япон улс дотоодын аялал жуулчлалтай холбоотой хязгаарлалтаа цуцаллаа. Тус улсын Ерөнхий сайд Абэ Шинзо Вьетнам, Тайланд, Австрали болон Шинэ Зеландаас жуулчин хүлээж авах асуудлыг судалж байгаагаа мэдэгджээ.

Казахстаны Ерөнхийлөгч асан Нурсултан Назарбаев “COVID-19”-ийн халдвар авсан нь тогтоогдлоо.

Энэтхэгт халдварын тохиолдол 13.8 мянгаар нэмэгдсэн бол Бразилд 17.8 мянгаар нэмэгдэж, нэг сая дөхөөд байна.

АНУ-ын Техас мужид халдварын тохиолдол 3.6 хувиар буюу өмнө нь байгаагүй өндөр хурдаар нэмэгдлээ. Флоридад халдварын шинэ тохиолдол хамгийн өндөр түвшиндээ хүрсэн байна.

Дэлхийн хэмжээнд шинэ төрлийн коронавирусийн халдвар авсан 8.5 сая, эндсэн 455 мянган тохиолдол бүртгэгдээд байна. Харин эдгэрсэн хүний тоо 4.5 сая давжээ.

Эх сурвалж: www.polit.mn