О.ЭНХЖИН

Манай улсын иргэд хот, суурин газар амьдрах болсноос үндэсний ёс заншлаасаа хөндийрөх болсон. Тэгвэл энэ зуны налгар цагт амарч зугаалангаа, нүүдэлчдийн соёлтой танилцан, өөрийн биеэр оролцох боломж байна. Төв аймгийн Алтанбулаг сумын хоёрдугаар багийн нутаг дахь "Баянсонгино малчдын бүлэг"-ээс зохион байгуулдаг “Хонины найр” эвент энэхүү боломжийг аялагч, жуулчдад олгох аж. Тус эвент нь энэ жил тав дахь удаагаа болох гэж байгаа бөгөөд ирэх сарын 28-ны өдөр 10:00 - 16:00 цагийн хооронд болно.

Эвентэд хамрагдсанаар бог малаас гарах түүхий эдийг боловсруулах, боловсруулсан түүхий эдээ бүтээгдэхүүн болгоход оролцоно. Мөн хотын битгий хэл хөдөө орон нутгийнхны ч төдийлөн хийж үзээд байдаггүй уламжлалт аргаар эсгий хийх үйл явц болох ноос савах, зулах зэргийг гар бие оролцон хийж үзэх юм байна. Түүнчлэн олон төрлийн цай чанах зэрэг үйл ажиллагаанууд ч байгаа гэнэ. Хөтөлбөрийг танилцуулвал:

- Ардын урлагийн тоглолт                                                                  
- Уламжлалт аргаар эсгий хийх ажиллагаа
- Цайны баяр /таван төрлийн цайны амталгаа, тогоо нэрэх/
- Дээс томох, утас ээрэх, нэхий эдлэх
- Эсгий болон ноосоор хэрхэн бэлэг дурсгалын зүйлс хийхийг харах, өөрийн биеэр хийж үзэх
- Хонь холбох
- Сайн эр хонины танилцуулга, шалгаруулалт гэх зүйлс багтаж байгаа аж.

Арга хэмжээнд хамрагдах захиалгыг цахимаар өгнө. Сонирхуулахад жуулчдын төлөх үнэ 30 мянган төгрөг бол улс дотоодынхоо аялагч, хөтөч нартаа үүнээс гурав дахин хямдаар хамрагдах боломжыг олгож байгаа гэнэ. Энэ нь гадаад улсын иргэдэд түүх соёлоо суртчилахаас өмнө эхлээд Монголынхоо иргэдийг үндэсний соёлоо мэдэж аваасай гэсэн хэрэг. Үнэхээр л мартагдах шахсан бахархалт соёлоо амарч зугаалахынхаа сацуу танин мэдэх давхар боломжийг тус эвентээс олгож байна.
 

Эх сурвалж:www.polit.mn