Т.САЙХАН

ЭМЯ-наас /06.06/ ээлжит мэдээллээ хийж, коронавирусын нөхцөл байдлыг танилцууллаа.

Коронавирус-Монголд

"Өнгөрсөн хоногт нийт 255 хүнд шинжилгээ хийснээс 253 хүнээс шинэ коронавирус илрээгүй. Харин тавдугаар сарын 28-нд Алтанбулагийн боомтоор орж ирсэн хоёр оюутны давтан шинжилгээгээр коронавирусийн халдвар илэрлээ.Мөн өнөөдөр нэг оюутан эдгэрч гарч байна. Энэ оюутан 22 настай, 23 хоног эмчлэгдээд гарлаа. Ингэснээр Монгол Улсад халдварын тохиолдол 193 боллоо.  71 хүн эдгэрч гарсан байна.Биеийн байдлын хувьд 108 хүн хөнгөн хэлбэртэй байна. Хүндэвтэр 14 хүн байгаа. 8-16 насны нэг хүүхэд бий. Коронавирусийн халдвартай жирэмсэн 3 эмэгтэй, элэгний хавдартай нэг хүн, чихрийн шижин өвчтэй нэг хүн эмчлэгдэж байна" гэж ХӨСҮТ-ийн захирал Д.Нямхүү мэдээлэв. 

Коронавирус-Вакцин

АНУ-ын Засаг захиргааны зүгээс шинэ коронавирусын вакцин гаргаж авах магадлал өндөртэй таван компанийн нэрийг удахгүй зарлана гэсэн мэдээлэл байна.

Үүнд:

• Модерна
• Оксфордын их сургууль
• Эм үйлдвэрлэлийн Жонсон ба Жонсон зэрэг компани багтаж магадгүй аж.

Модерна, Оксфордын их сургууль, Астрагийн түншлэлийн хөгжүүлж буй вакцин эмнэл зүйн сүүлийн шатны туршилтаа долдугаар сард эхлүүлэх төлөвлөгөөтэй байгаа юм байна" гэдгийг ЭМЯ-наас мэдээлэв.

ДЭМБ-ын уриалга

Маск зүүх нь бүрэн хамгаалалт болохгүй ч тодорхой үр дүнтэй байгааг ДЭМБ хэлж хүн олноор цугласан газраар явахдаа иргэдийг зайлшгүй маск зүүх шаардлагатайг онцолсон байна. Түүнчлэн эрүүл мэндийн байгууллагын бүх ажилтан маск зүүхийг зөвлөжээ.Гэхдээ маск зүүсэн ч гараа тогтмол угаах, бусдаас зай барих дэглэмээ үргэлжүүлэн хэрэгжүүлэх хэрэгтэйг иргэдэд сануулсан байна.

Эх сурвалж: www.polit.mn