Г.ПҮРЭВГОЧОО

“Интер” номын их дэлгүүрээс  өнгөрсөн долоо хоногт борлуулалтаараа тэргүүлж бестселлер болсон бүтээлүүдийг танилцуулжээ.  Энэхүү жагсаалтыг зохиолч, зураач Дейв Пилкигийн “Нохой-Хүн”, “Нохой хүн сулласан нь” хэмээх цуврал ном  тэргүүлсэн байна.  АНУ-ын “Нью-Йорк таймс” сонины хамгийн их борлуулалттай №1 бестселлер номоор шалгарч байсан тус ном нь хүүхдийн зан суртахуун, хүмүүжил төлөвшилд чиглэснээрээ онцлогтой юм. Энэхүү зурагт ном нь нохой толгойтой, хүний биетэй нохой хүнд тохиолдсон хөгжилтэй түүхийн талаар өгүүлэх юм. Яагаад хүүхдэд зурагт ном уншуулах хэрэгтэй вэ? Хүүхэд элдэв янзын зурагтай ном унших нь ном унших сонирхлыг нь хөдөлгөх ба цаашид номтой нөхөрлөх үндэс суурийг нь тавих юм. Ялангуяа уншиж сураагүй хүүхэд хэтэрхий их текстээс залхах болно. Харин зурагт номоос олон янзын шинэ зүйлийг олж харан, эцэг эхийн уншиж буйд ч анхаарлаа төвлөрүүлж чаддаг байх нь. Тиймээс хүүхдэдээ энэхүү зурагт номыг авч өгөн нохой хүний хөгжилтэй адал явдлаар аялуулаарай.

Эх сурвалж:www.polit.mn