С.САРУУЛ

Сүүлийн 24 цагийн дотор дэлхий нийтэд 95 мянган хүн шинээр халдвар авч, 4000 гаруй хүн нас баржээ. Энэ нь өмнөх өдрөөсөө өвчилсөн хүний тоо 12 мянгаар, нас барсан хүний тоо 1300-аар буурсан үзүүлэлт юм. Өчигдөр ОХУ-д өвчлөл 9200-аар нэмэгдсэн бөгөөд Буриадад 41, Эрхүүд 21, Тувад 31 тохиолдол бүртгэгджээ.

Манай улсын хувьд өчигдөр 108 хүн ажиглалтад нэмэгдсэн бол 26 хүн тусгаарлах байрнаас гарч, гэрийн тусгаарлалтад шилжсэн. Ингээд өнөөдрийн байдлаар тусгаарлах байранд нийт 1747 хүн байна.

ХӨСҮТ-ийн захирал Д.Нямхүү”Өнөөдөр /2020.05.17/ нэг оюутан эдгэрч 14 хоногийн сувилалд шилжлээ. Мөн Туркийн хоёр иргэн ажиглалтын хугацаагаа бүрэн дуусгаж гэртээ гарлаа.  ХӨСҮТ болон Дархан-Уул аймагт 156 хүнд шинжилгээ хийлээ. Дархан-Уул аймагт хийгдсэн шинжилгээнүүдэд коронавирус илрээгүй. ХӨСҮТ-д давтан шинжилгээнүүд хийсэн. Давтан шинжилгээнүүдээс ОХУ-аас ирсэн цэргийн сургуулийн нэг оюутнаас илэрч 136 боллоо. Өмнө нь энэ сургуулийн 55 оюутнаас илэрсэн. Эдгээр оюутан онгоцонд хамт сууж ирсэн” гэв.

Өвчилсөн хүмүүст нарийн шинжилгээ хийхэд 23 хүний биеийн байдал хүндэвтэр, 92 хүний биеийн байдал дунд зэрэг байна гэж дүгнэжээ. Мөн ХӨСҮТ-д 8-16 насны таван хүүхэд эмчлэгдэж байгаа бөгөөд тэдгээр хүүхдүүдийн биеийн байдал дунд зэрэг байгаа юм.

БНЭУ

Дэлхий дахинд өчигдөр гарсан нэг өөрчлөлт нь БНЭУ-д бүртгэгдсэн халдварын тоо БНХАУ-ын тооноос давж, дэлхийн хэмжээнд эхний 11-т бүртгэгдэх болжээ.

ДЭМБ-ын тавдугаар сарын 16-ны өдрийн мэдээллээр БНЭУ-д нийт халдвар авсан хүний тоо 85,900 гаруйд хүрч, өвчний улмаас 2,700 гаруй хүн нас барж, 30 мянган хүн эдгэрчээ. Одоогоор тус улсад 53 мянга гаруй хүн идэвхтэй халдвартай хүн байгаа юм.

Бразил

Бразил улсад шинэ халдварын тоо 15 мянгаар нэмэгдэж, нийт тохиолдлын тоо 233 мянга болсон байна. Ингэснээр тус улсад бүртгэгдсэн нийт халдварын тоо Испани, Итали улсын тооноос давж, дэлхийн хэмжээнд дөрөвдүгээрт бичигдэх болжээ.

Мөн тус улсад сүүлийн 24 цагийн дотор 816 хүний нас баралтын тохиолдол бүртгэгдсэн байна.

ОХУ

ОХУ-д нийт халдварын тохиолдлын тоо 272 мянга гаруйд хүрч, 2,537 хүн уг өвчний улмаас нас бараад байна.

Сингапур

Тус улсад сүүлийн 24 цагийн дотор 465 шинэ тохиолдол, нэг нас баралт бүртгэгдсэн байна.Шинэ тохиолдлуудын дөрөв нь тус улсын байнгын оршин суугч иргэд бол үлдсэн нь гадаадын цагаачид байгаа юм.

Өнөөдрийн байдлаар Сингапурт бүртгэгдсэн нийт тохиолдлын тоо 27 мянга гаруй болсон байна.

Япон

Япон улсад Баасан гарагт үндэсний хэмжээнд COVID-19 халдварын 57 шинэ тохиолдол, нас баралтын 19 тохиолдол нэмэгдсэн.

Одоогоор нийт халдварын тохиолдлын тоо 16,300 байгаагаас 11,800 гаруй нь эдгэрч эмнэлгээс гарсан байна.

БНСУ

Тус улсын Өвчний хяналт, сэргийлэлтийн төвийн мэдээлснээр шөнийн клубын голомтод халдвараас эхтэй халдварын тоо өчигдөр 9-өөр дахин нэмэгдэж, 162 болжээ. Шөнийн клубүүдээр үйлчлүүлсэн иргэдийн зарим нь өөр кароаке, баараар үйлчлүүлж, хоёрдогч байдлаар халдвар дамжсаныг Баасан гарагт илрүүлсэн байна. Голомтод халдварыг илрүүлэх үүднээс тус улсад нийт 46 мянга гаруй шинжилгээ хийжээ.

Үүнээс гадна өчигдөр БНСУ-д дөрвөн тохиолдол гаднаас зөөвөрлөгдөж, нийт халдварын тохиолдлын тоо 11,050 болжээ.

ХБНГУ

ХБНГУ хязгаарлалтын арга хэмжээнүүдээ цуцалж, Европын зарим улстай хоёр талын хилээ харилцан нээх асуудлыг тохиролцож байна.Өнгөрсөн долоо хоногийн сүүлчээр тус улсын халдварлалтын индекс нэг хувьтай байсан бол тавдугаар сарын 16-ны өдрийн мэдээллээр буурч, 0.88 хувьтай болжээ.

Өнөөдрийн байдлаар тус улсад нийт 173700 хүн халдвар авсан бөгөөд 152 мянга орчим хүн эдгэрч эмнэлгээс гараад байгаа юм.

Эх сурвалж: www.polit.mn