Т.САЙХАН
Засгийн газрын өнөөдрийн ээлжит хуралдаанаар хэд хэдэн асуудлыг шийджээ. Тухайлбал, Онцгой байдлын ерөнхий газрын дарга, хошууч генерал Т.Бадралыг БНХАУ-д суух Элчин сайдаар томилох асуудлыг хэлэлцэж дэмжсэн байна. Улмаар ойрын хугацаанд Ерөнхийлөгчид танилцуулахаар болжээ. Ерөнхийлөгч түүнийг дэмжвэл УИХ-аар хэлэлцүүлж, томилох юм. Т.Бадрал нь 1974-1984 онд Улаанбаатар хотын 18 дугаар сургууль, Эрдэнэт хотын нэгдүгээр дунд сургуулийг дүүргэсэн. 1984-1988 онд ЗХУ-ын Москва хотын Хилийн цэргийн командын дээд сургуульд суралцсан бөгөөд 1990-1994 онд МУИС-ийн Олон улсын харилцааны дээд сургуулийг олон улсын харилцаа, франц судлалын мэргэжлээр 1999-2001 онд Санхүү, эдийн засгийн дээд сургуулийг Бизнесийн удирдлагын чиглэлээр бакалавр, 2013 онд Улаанбаатар-Эрдэм дээд сургуулийг бизнесийн удирдлагын мастер зэрэгтэй ,сурч төгссөн. 2013 онд Шинэ Зеландын Массигийн их сургуульд англи хэлний курсийг дүүргэсэн. Англи, орос, франц хэлтэй.
Ажилласан байдал
- 2004-2005 онд Гамшгаас хамгаалах ерөнхий газарт мэргэжилтэн, ахлах мэргэжилтэн,
- 2005-2006 онд Онцгой байдлын ерөнхий газрын Стратегийн төлөвлөлт, гадаад харилцааны газрын дарга,
- 2008 онд Гадаад харилцаа, хамтын ажиллагааны хэлтсийн дарга,
- 2009-2015 онд Онцгой байдлын ерөнхий газрын дэд дарга,
- 2015 оноос Онцгой байдлын ерөнхий газрын дарга, Улсын Онцгой комиссын орлогч даргаар ажиллаж байна.
- 2008-2013 онд Дэлхийн банкны санхүүжилттэй “Шувууны томуу, хүний томуугийн цар тахалтай тэмцэх чадавхыг сайжруулах төсөл”-ийн зохицуулагч, төслийн удирдах хорооны дарга,
- 2015 оноос НҮБХХ-өөс хэрэгжүүлж байгаа “Орон нутгийн гамшгийн эрсдэлийг бууруулах чадавхыг сайжруулах төсөл”-ийн захирал,
- Мөн 2008 оноос НҮБ-ын Гамшгийн үнэлгээ зохицуулалтын газар (UNDAC)-ын гамшгийн үнэлгээ зохицуулалтын багийн гишүүнээр тус тус ажиллаж байна.
- 2015 оны гуравдугаар сарын 18-ны өдөр Ерөнхийлөгч Ц.Элбэгдоржийн зарлигаар Бригадын генерал цол хүртсэн Онцгой байдлын асуудал эрхэлсэн байгууллагын анхны генерал цолтон.
- 2017 оны долдугаар сарын 9-ний өдөр мөн хошууч генерал цол хүртсэн байна.
Эх сурвалж:www.polit.mn