С.САРУУЛ
УОК-ын шуурхай штабаас даваа гаригаас эхлэн автомашиныг тэгш, сондгойгоор явуулах талаар мэдээлсэн. Тэгвэл Тээврийн цагдаагийн албанаас дугаарын хязгаарлалт урьдын адил хэвийн үргэлжилнэ гэдгийг мэдэгдлээ. ТЦА-ны Урьдчилан сэргийлэх хэлтсийн дарга, цагдаагийн хошууч Э.Энхболд "УОК-ын 2020 оны дөрөвдүгээр сарын 10-ны 437 тоот албан бичгээр аймаг, нийслэлийн тээврийн хэрэгслийг тэгш сондгойгоор хязгаарлах зохицуулах арга хэмжээг авах тухай бичгийг Засаг дарга нарт хүргүүлсэн байгаа. Өнөөдрийн байдлаар аль нэг аймаг, нийслэлийн Засаг даргаас тээврийн хэрэгслийг тэгш, сондгойгоор хөдөлгөөнд оролцуулах шийдвэр гараагүй байна. Хуулийн дагуу аймаг, нийслэлийн Засаг дарга захирамж гаргаж байж хязгаарлалт хийгддэг.
Тиймээс нийслэлийн иргэдийн хувьд маргааш буюу Даваа гаригт хуучин журмаараа замын хөдөлгөөнд оролцоно. Өөрөөр хэлбэл, 1 болон 6-аар төгссөн тээврийн хэрэгслүүд 08:00-20:00 цагийн хооронд хязгаарласан бүсэд хөдөлгөөнд оролцохгүй гэсэн үг. Тээврийн хэрэгслийн тэгш, сондгой хязгаарлалт хийхгүй юм.
Аймаг, нийслэлийн Засаг дарга нар УОК-оос явуулсан бичгийн дагуу тодорхой нутаг дэвсгэртээ тэгш, сондгойгоор явуулах захирамжийн төслийг боловсруулаад, батлуулаад ард иргэдэд мэдээлсний дараа Цагдаагийн байгууллагаас дугаарын хязгаарлалттай холбоотой зохицуулалтыг хийнэ. Тэр болтол тэгш, сондгойгоор хязгаарлана гэсэн батлагдаагүй шийдвэрийг дагах хэрэггүй” гэлээ.
Эх сурвалж: www.polit.mn