С.САРУУЛ

Эрүүл мэндийн яамнаас COVID-19 халдварын цаг үеийн нөхцөл байдлын тухай ээлжит мэдээллээ өглөө. /2020.03.31/ Энэ үеэр ЭМЯ-ны Эмнэлгийн тусламжийн газрын дарга Я.Буянжаргал "Тусгаарлах байранд 2310 иргэн ажиглалтад байна. Эдгэрсэн хоёр иргэнийг тусгаарлалтын байранд шилжүүлэн үргэлжлүүлэн ажиглалтад аваад байгаа. Тусгаарлагдсан иргэдээс гомдол, санал хүсэлт ирж байна. Агуулгын хувьд хоол амтгүй, өрөө жижигхэн, өрөөндөө дасгал хиймээр байна зэрэг шаардлагыг тавьж байгаа. Эмчийн өөдөөс вариантай талхаа шидэж, мөөгтэй хоол идэхгүй гэж уйлж, "Нохойн хоол өглөө" гэж уурлаж, хоорондоо зодолдож байна. Өнөөдөр эмчээрээ хоол зөөлгөж байгаа иргэн Монгол Улсаас өөр байхгүй. Эрүүл мэндийн тусламж үзүүлж байгаа эмч нар бол дэлхийд урилгаар очдог, ДЭМБ-ын зөвлөхөөр ажилладаг, Энхийг сахиулах үйлсэд эх орныхоо багийг ахлан явж байсан хүмүүс. Тиймээс иргэд авираа татах хэрэгтэй байна" гэлээ. 

ХӨСҮТ-ийн ерөнхий захирал Д.Нямхүү "ХӨСҮТ-д 2020.03.30-нд тусгаарлагдсан долоон хүнээс COVID-19 вирус илрээгүй. Мөн эмнэлэгт хандсан уушгины хатгалгаагаар өвдсөн хүмүүсээс сорьц цуглуулж шинжилгээ авахад вирус илрээгүй. Өнөөдрийн байдлаар ХӨСҮТ-д 218 хүн хяналт, тандалт, шинжилгээнд хамрагдаад байна" гэв. 

Эх сурвалж: www.polit.mn