Монголын Үндэсний музей, Polit.mn сайт хамтран түүх, соёлын хосгүй үнэт үзмэрээс дээжлэн хүүхэд багачууд, эрхэм уншигчид үзэгчиддээ цувралаар толилуулж байна. Энэ удаа Билгэ хааны алтан титмийг онцоллоо. Энэхүү дурсгалын  холбогдох он цагийг  YI-YIII зуун хэмээн тогтоожээ. Титмийн өндөр 9.3 см, урт  нь 23 см, жин нь 80 грамм юм.  Түргийн Билгэ хаан 734 онд тэнгэрт халихад түүнд зориулан тахилын онгон байгуулсан нь одоогийн Архангай аймгийн Хашаат сумын нутагт оршдог. Уг тахилын онгоныг 2001 онд Монгол-Туркийн хамтарсан археологийн судалгааны анги малтан судлах үеэр олон тооны алт, мөнгөн эдлэл олдсоны нэг нь энэхүү титэм билээ. Титэм нь алтаар бүтээгдсэн, 23 см орчим хагас дугуй хэлбэртэй, таван хэсэг бүхий юм. Төв хэсэгт нь хошуундаа эрдэнийн чулуу зууж жигүүрээ дэлгэсэн жигүүртэн байх бөгөөд шувууны их бие, өд сөд, далавчийг нь тод томруун сийлжээ. Түүний хоёр хажууд цэцэг навчин хээтэй дэлбээ мэт хэсэг үргэлжлэх хийгээд титэмний суурь бүслүүр, их бие дээр эрдэнийн чулуу шигтгэж байсан нуух хоногууд харагдана. Уг дурсгалыг Монгол Улсын Засгийн Газрын 2003 оны 124 тоот тушаалаар “Хосгүй үнэт дурсгалт зүйл”-ээр баталсан байна.  

Эх сурвалж: http://nationalmuseum.mn