Б.БАЯРЖАВХЛАН

Шинэ коронавирусын тархалттай холбоотой ээлжит мэдээллийг Эрүүлмэндийн яамнаас хийлээ. Манай улсын хувьд дэглэм тогтоосноос хойш 3115 хүнийг ажиглалтад авснаас 1951 нь тусгаарлах байранд байна. Тэднийг зочид буудал, амралт, сувиллын газар, Цэргийн төв эмнэлэг, Халдвар өвчин судлалын үндэсний төвд тусгаарласан. Мөн Баян-Өлгий, Сэлэнгэ, Дархан-Уул аймагт тусгаарлаж байна. Орхон аймгийн бүсийн оношилгоо эмчилгээний төв рүү өчигдрөөс эхлэн тусгаарлах ажлыг зохион байгуулж эхэлсэн. Энд Алтанбулагийн боомтоор дамжин орж ирсэн иргэдийг тусгаарлаад байгаа юм.

Халдварт өвчин судлалын үндэсний төвийн захирал Д.Нямхүү

“Сөүл- Улаанбаатар нислэгээр  2020 оны гуравдугаар сарын 15-нд ирсэн 153 хүний шинжилгээний хариу сөрөг гарлаа. Энэхүү тусгай нислэгээр ирсэн хоёр хүний шинжилгээний хариу эерэг гарсныг та бүхэн мэдэж байгаа. Өнөөдрийн байдлаар нийт 10 хүн шинэ коронавиурсийн халдвартай нь батлагдаж, эмчлүүлж байгаа, бүгдийнх нь бие сайжирч байна. Хоёр өвчтөн хүнд байсан ч өдөр ирэх тусам бие нь сайжирч байна. Өнөөдрийн байдлаар сэжигтэй тохиолдол илрээгүй. Харин энэ өдөр 90 хүнийг аймгуудад мөн Улаанбаатар хотын зарим тусгаарлах төвд ажиглалтад оруулсан.  2020 оны гуравдугаар сарын 20-нд тусгаарлалтад орсон нэг хүний хариу сөрөг гарсан. Зөвхөн тусгай үүргийн нислэгээр ирсэн хүмүүсийг шинжлээд зогссонгүй, доторх иргэдээ давхар хянаж байна. Тухайлбал, уушигны хатгалгаагаар эмнэлэгт хэвтсэн хүмүүсээс коронавирусийн шинжилгээ авахад илрээгүй. Сайхан мэдээ дуулгаж байгаадаа маш их баяртай байна” гэв.

Эх сурвалж: www.polit.mn