Х.ОЮУНБОЛД Йеменийн босогчдын хутис бүлэглэл Хабб, Шааф дүүрэг болон Аль Хазмын цөлийг орхиж Саудын Арабтай хиллэдэг Эль Жауф мужийн захиргааг хяналтдаа авсан гэж мэдэгдсэн байна. Мөн энэ бүс нутагт таван удаа хийсэн мөргөлдөөний дараа сөргөлдөгч бүлэглэлийн 100 гаруй цэргийг устган, шархдуулж олзолсон гэж мэдэгдсэнийг хутис “Аль Масира” сонин мэдээлжээ. Түүнээс гадна 50 гаруй байлдааны үйл ажиллагаа явуулсны зарим нь Саудын Арабын хэрэгжүүлсэн цэргийн шаталсан ажиллагааны хариуд хийсэн гэв. Саудын Арабын толгойлсон эвслээр дэмжүүлсэн Абд Раббу Мансур Хади ерөнхийлөгчийн Засгийн газар болон Ираны дэмжлэгийг авсан босогчдын хутис бүлэглэлийн хооронд өрнөсөн Йемен дэх мөргөлдөөн нь дэлхийд хүмүүнлэгийн том хямралыг гарахад хүргэснээс гадна 100 мянган хүн амь үрэгдсэн байна. Мөн энэ улсын хүн амын 80 хувьд нь хүмүүнлэгийн тусламж шаардлагатай байгаа бөгөөд 10 сая хүнд өлсгөлөн нүүрлээд байгаа аж. Харин долоон сая хүн хоол, хүнсний дутагдалд ороод байгаа юм байна. Эх сурвалж: www.polit.mn