С.УЯНГА Засгийн газрын хуралдаанаар түгжрэлийг бууруулах “Тэнгэрийн тойрог”, нийтийн тээврийг шинэчлэх “Агаарын дүүжин тээвэр” төсөл нэгэн зэрэг орж дэмжигдсэнийг  Зам тээврийн хөгжлийн сайд Б.Энх-Амгалан танилцуулсан. Гэтэл олон нийт онцлог, зориулалт биш оноосон нэрэнд нь ач холбогдол өгч нэлээд шүүмжлэх шиг боллоо. Өөрөөр хэлбэл, дүүжин, тэнгэрийн гэдэг үг буруутав бололтой. Гэтэл энэ хоёр төслийн аль алиныг нь жаахан сонирхож харвал үүрэг, зориулалт огт өөр. Тэнгэр, газар шиг ялгаатай юм билээ. Дүүжин тээврийг нийтийн тээвэрт ашиглаж кабинд нь хүн суулгаад явах бол “Тэнгэрийн тойрог” төсөл түгжрэлийг хуваалцах давхар зам гэж ойлгож болно. Бусад улс орны адил тойрог хэлбэртэй давхар замыг олон улсынхаа нэршлээр “Тэнгэрийн тойрог” гэж нэрлэжээ. Уг нь иргэд хурууны үзүүрээ хөдөлгөх төдийд л төслүүдийн талаарх мэдээлэл цахим хуудсаар дүүрэн бий. Зөвхөн зургийг нь харахад  хэнд ч ойлгомжтой. Ядаж тээвэр, зам хоёроо ялгаж харчихаад нэгнийхээ хийсэн ажлыг баалъя. Шүүмжлэлийн талаар Зам тээврийн хөгжлийн сайд Б.Энх-Амгалан тайлбар өгөхдөө “Тэнгэрийн тойрог төсөл 2011 онд анх эхэлж гурван удаагийн УИХ, хэд хэдэн удаагийн Засгийн газар, нийслэлийн төр захиргааны байгууллагад танил­цуулагдаж, зөвлөмж саналыг нь тусган сайжруулсаар өнөөдрийг хүрсэн мега төсөл юм билээ. Төсвөөс нэг ч төгрөг одоо ч, ирээдүйд ч гаргалгүйгээр ийм хэмжээний бүтээн байгуулалт хийх санал санаачлагыг хувийн хэвшлийн зүгээс гаргалаа. Дэмжиж болох юм гэдэг байр сууриа төр илэрхийллээ. Олон нийтийн дунд төсөөллийн янз бүрийн дүр зураг хүчтэй түглээ. Төслийн буруу юу, төсөөллийн буруу юу” хэмээжээ. Эх сурвалж: “Зууны мэдээ” сонин 2020.3.18  ЛХАГВА  № 52 (6277)