М.ЗҮЙР Сүхбаатар дүүргийн онцгой байдлын хэлтсийн дарга дэд хурандаа Д.Бэхбаяраас зарим зүйлийг тодрууллаа.   -Коронавирусын улмаас Монгол Улс гамшигаас хамгаалах өндөржүүлсэн бэлэн байдалд хэсэгчлэн  шилжсэн үүнтэй холбогдуулан Сүхбаатар дүүргийн хэмжээнд ямар арга хэмжээ авч ажиллаж байна вэ? -Дүүрэг хороодын хэмжээнд байгуулагдсан шуурхай дэд штабуудын үйл ажиллагааг тодотгож, Гамшгаас хамгаалах  алба, мэргэжлийн ангиудыг ажлын тусгай горимд шилжүүлэн бэлэн байдлыг ханган ажиллаж байна. Онцгой байдлын ерөнхий газар, нийслэлийн шуурхай штабууд 24 цагаар үүрэг гүйцэтгэн, цаг үеийн мэдээ мэдээллийг нэгтгэн алба, мэргэжлийн ангиудыг  нэгдсэн удирдлагаар ханган ажиллаж байна. -Өндөржүүлсэн бэлэн байдлын зэрэгт шилжлээ гэхээр ард иргэд нэлээд сандралд орох шиг боллоо? -Иргэд төр засаг болоод мэргэжлийн байгууллагуудаас гаргасан зөвлөмжийг хэрэгжүүлж, ариутгал, халдваргүйжүүлэлтийн дэглэмээ сахиад, элдэв худал цуурхалд автахгүй байхыг сануулах байна. Худал цуурхалд автаж гурил будаа нөөцлөх хэрэггүй. Дахин сануулахад төр, засгийн зүгээс шаардлагатай, боломжтой бүхий л арга хэмжээг авч байна. Харин иргэн үүргээ биелүүлж, мэргэжлийн байгууллагын зөвлөгөөг дагаж, сар шинийн баяраар  өргөн золголт  хийхгүй, өрх гэрийнхээ хүрээнд цагаан сараа тэмдэглэхийг хүсээд байгаа юм. Короновирус анх зарлагдсанаас хойш 50 гаран хоног болж байна. Энэ хугацаанд хэдийгээр манай улсад бүртгэгдээгүй байгаа ч маш эрсдэл өндөртэй орны тоонд орж байгаа. -Хэрэв төр засгаас тогтоосон хорио цээр зөрчсөн тохиолдолд яах вэ? -Бүгд өөрсдийн аюулгүй байдлаа хариуцах ёстой. Энэ нь ганцхан төр засгийн ажил биш. Хувь хүний хариуцлага юм. Төр засгаас гаргасан шийдвэрийг илт зөрчсөн иргэдэд шууд хариуцлага тооцно. Нийслэл дүүргийн төрийн байгууллагын алба хаагчид хороо гудамжаар  явган эргүүлээр ажиллуулах шийдвэр гараад ажиллаж  байгаа бөгөөд эргүүлүүд нь иргэдэд амны хаалтаа зүүх, олон нийтийн газар нус, шүлсээ хаяхгүй байх, ил задгай бие засахгүй байхыг сануулж ажиллах үүрэгтэй. Шаардлагыг биелүүлээгүй иргэд, аж ахуйн нэгж байгууллагад Зөрчлийн тухай хууль болон бусад холбогдох хууль тогтоомжийн дагуу арга хэмжээг авах болно. Эх сурвалж: www.polit.mn