Д.АРИУН Нэгдсэн үндэсний байгууллага /НҮБ/-ын Ерөнхий нарийн бичгийн дарга асан Перугийн дипломат  Хавьер Перес де Куэльяр энэ лхагва гариги 100 насандаа таалал төгссөн байна. Түүний хүү Франсиско Перес де Куэльярын хэлснээс эшлэн  энэ талаар Andina агентлаг  мэдээлжээ. НҮБ-ын ерөнхий нарийн бичгийн дарга Антониу Гутерреш талийгаачийн гэр бүлийнхэнд эмгэнэл илэрхийлсэн байна.  Перугийн нийслэл Лима хотноо энэ бямба гаригт Хавьер Перес де Куэльярыг оршуулах ёслол болох аж. Хавьер Перес де Куэльяр нь 1920 оны нэгдүгээр сарын 19-нд төрсөн. Лимагийн Католикийн их сургуулийг хуулийн мэргэжлээр төгссөн. 1940-өөд оноос дипломат албанд хүчин зүтгэсэн хүн. Тэрээр 1982-1991 онд НҮБ-ын Ерөнхий нарийн бичгийн даргаар ажилласан билээ. Түүнийг Ерөнхиий нарийн бичгийн даргаар ажиллаж байхад  Фолклендын арлаас болсон Англи-Аргентины мөргөлдөөн, Венесуэл орчмын хилийн маргаан, Намибын нөхцөл байдал, Иран-Иракийн харилцаа, Мароккогийн Засгийн газар болон Полисарио Фронтын хоорондын гал зогсоох хэлэлцээр гээд дэлхийн олон халуун цэгийн асуудлуудыг шийдэж байжээ. Перес де Куэльярын ажил үйлийг үнэлж, дэлхийн 25 орноос түүнийг шагнаж байсан түүхтэй аж. Эх сурвалж: www.polit.mn