С.САРУУЛ Эрүүл мэндийн яамнаас шинэ коронавирусын халдварын тархалтын нөхцөл байдлын талаар ээлжит мэдээллээ өглөө. /2020.03.05/ Өнөөдрийн байдлаар Монголд коронавирусын халдвар бүртгэгдээгүй байна. ЭМЯ-ны Шуурхай удирдлагын газрын дарга Д.Нарангэрэл “КОВИД-19 халдвар 79 оронд бүртгэгдээд байна. БНХАУ, БНСУ, Итали, Иранд халдвар голомтлон тархаж, гурван улсад халдварын анхны тохиолдол бүртгэгдлээ. БНСУ-ын Дэгү хотод халдвар олноор илэрч байгаа нь сүмээс гадна балетын сургалтын төвд халдвар гарснаас үүдсэн байна. Мөн Японд урлагийн тоглолт үзсэн 15 хүнээс халдвар илэрснийг мэдээлсэн. Хүн амын бөөгнөрөл нь халдвар тараах үндэслэл болж байгаа. Австрали, АНУ-д асрамжийн газрын өндөр настнууд өвчилсөн байна" гэв. ЭМЯ-ны Эмнэлгийн тусламж, үйлчилгээний газрын дарга Я.Буянжаргал “Өнөөдөр өглөөний Нурсултан-Улаанбаатарын чиглэлийн нислэгээр 27 зорчигч ирсэн. Үүнээс нэг зорчигчийг Багабаян дахь амралтын газар тусгаарласан. Өчигдөр /2020.03.04/ Москва-Улаанбаатар чиглэлийн 07:15 цагийн нислэгээр нэг гэр бүлийн гурван хүн Итали улсаар дамжин зорчоод ирснээ мэдээлэлгүй буусан байсныг хууль, хяналтын байгууллагатай хамтран тандалт судалгаа хийж тусгаарласан. Тухайн иргэд хоёрдугаар сарын 12-нд Улаанбаатараас гарч Женев-Милан-Женев-Франц гэсэн маршрутаар зорчоод Москвагаар дамжиж ирсэн мэдээллээ нууж, ирсэн даруйдаа ажилдаа очсон байна. Өвчлөл гарсан оронд зорчсоноо нуух нь маш хариуцлагагүй үйлдэл. Нэгдүгээр  сарын 9-нөөс хойш 532 сэжигтэй тохиолдлыг ажиглалтад авсан” гэлээ. Эх сурвалж: www.polit.mn