Шинээр илэрсэн халдварууд нь бүгд Италийн хойд бүс нутгаас гаралтай байгаа юм. Тухайлбал Италийн Ломбарди мужид зорчоод эх орондоо эргэж ирсэн 61 настай иргэн Бразил улсын анхны халдвар тээгч болжээ. Мөн Грек, Финланд улсууд өчигдөр Италиас ирсэн хүнээс анхны халдварын тохиолдлуудаа бүртгэсэн байна. Испани, Хорват, Австри, Умард Македон, Алжир улсуудад илэрсэн шинэ тохиолдлууд бас Итали улстай холбогдож байв. Итали улсад одоогийн байдлаар шинэ коронавирусын халдварын 374 тохиолдол бүртгэгдэж, 12 өвчтөн нас бараад байна. Европ тивд халдварын гол төв нь Итали улс болоод байгаа бол Ази тивд Өмнөд Солонгос, Ойрх Дорнодод Иран улс тархалтын төв болжээ. Өчигдөр /02.26/ Өмнөд Солонгост халдварын 284 тохиолдол шинээр бүртгэгдсэн нь нэг өдөрт илэрсэн хамгийн их хэмжээ болж байна. Тус улсад нийтдээ 1,261 хүн халдвар авч, 12 өвчтөн нас баржээ. Ойрх Дорнодод вирус тархалтын гол төв болоод байгаа Иранд өчигдрийн байдлаар нийт 139 халдвар бүртгэгдэж, 19 өвчтөн нас барсан мэдээлэл байгаа юм. Халдварт өвчнөөс урьдчилан сэргийлэх зөвлөмжийг мэргэжлийн байгууллагуудаас ирүүлсээр байна. Эх сурвалж:www.polit.mn