Д.АРИУН БНСУ-д COVID-19 вирусын халдвар авсан арав дахь өвчтөн нас барсан талаар өнөөдөр /2020.02.25/-ийн 16 цагийн YTN телевизийн мэдээллийн хөтөлбөрөөр мэдээлжээ. Халдвар авсан хүний тоо өглөөнийхөөс 84-өөр нэмэгдэж, нийтдээ 977 болсон байна. Харин 22 хүн эдгэрч гарсан бол, 13880 хүн шинжилгээнд хамрагдсан талаар тус телевизийн мэдээлэлд дурдав. Дэгү хотоос 27 км зайтай оршдог Чеонду /Cheongdo/-ийн эмнэлэгт арав дахь өвчтөн нас барсан гэдгийг тус улсын Эрүүл мэндийн яамны дэргэдэх Өвчний халдвар хяналтын албаны мэдэгдэлд дурдсан  байна. Халдварын гол цэг болоод байгаа Дэгү хотын сүмд цуглаанд ирсэн хорих ангийн хянагч халдвар авсан талаар тус улсын хэвлэлүүд мэдээлж байгаа юм. Шинэ төрлийн короновирусын халдвар нь БНХАУ-ын Ухань хотоос эхэлж дэгдэж, одоо дэлхийн 25 улсад халдвар тархсан нь бүртгэгдэж,  өнөөдрийн байдлаар /2020.02.25/ 2666 хүн амь насаа алдаад байгаа юм. Хүнээс хүнд агаар дуслын замаар халдварладаг энэ вивусын халдвараас хамгаалахын тулд амны хаалт зүүж, гараа угааж, ариутгаж, олон нийтийн газраар явахгүй байхыг эрүүл мэндийн мэргэжилтнүүд зөвлөж байгаа билээ. Эх сурвалж: www.polit.mn