Д.АРИУН БНСУ-д COVID-19 вирусын халдвар авсан хоёр дахь өвчтөн /2020.02.22/ нас барсан бөгөөд халдвар авсан хүний тоо 142-оор нэмэгдэж, нийтдээ 346 болсон байна. Энэ бол халдварын тархалт БНХАУ-ын дараа орох өндөр үзүүлэлт болохыг хэвлэлүүд онцлон мэдээлж байна. Шинээр бүртгэгдсэн халдварын ихэнх нь буюу 92 нь Дэгү хотоос холгүй орших Чеонду /Cheongdo/ дүүргийн эмнэлэгт бүртгэгдсэн байгааг тус улсын Эрүүл мэндийн яамны дэргэдэх Өвчний халдвар хяналтын албанаас мэдээлсэн байна. Өмнөд Солонгос дахь халдварын гол цэг болчихоод байгаа Дэгү хот дахь Христийн Шинчожи сүмийн 150 гаруй гишүүн шинэ төрлийн короновирусын халдвар авсан нь одоогоор тогтоогдоод байгаа аж. Учир нь 61 настай эмэгтэй, хоёрдугаар сарын 10-нд халуурч эхлэхээсээ өмнө хотын сүмийн цуглаанд дөрвөн удаа очсон байна. Дараа нь тэрээр халдвар авсан нь тогтоогджээ. Үүнээс улбаалан тус улсад короновирусын халдвар огцом нэмэгдээд байгаа юм. Чеонду /Cheongdo/ нь Дэгү хотоос 27 км зайтай оршдог, Шинчожи /Shincheonji/ сүмийг үүсгэн байгуулагч Ли Мэн-хээ /Lee Man-hee/-гийн төрсөн газар аж. Өнөөдөр буюу бямба гаригт халдварын 92 тохиолдол бүртгэгдсэн эмнэлэгт сүмийн үүсгэн байгуулагчийн ахыг оршуулах ёслол гурван долоо хоногийн өмнө болж өнгөрсөн талаар дүүргийн удирдлага мэдээлжээ. Уг оршуулах ёслолд сүмийн итгэгч олон хүн оролцжээ. Өмнөд Солонгосын дөрөв дэх том хот Дэгү нь 2,5 сая хүн амтай. Хотын дарга нь иргэдээ гэрээсээ гарахгүй байхыг уриалжээ. Мөн тус бүс нутагт байрладаг АНУ-ын цэргийн бааз руу нэвтрэх эрхийг хязгаарласан байна гэдгийг channelnewsasia.com мэдээлжээ. Вирусын халдвараас нас барсан эхний өвчтөн нь Чеонду /Cheongdo/-гийн эмнэлэгт удаан хэвтэж эмчлүүлж байсан аж. Түүнд уушигны хатгалгааны шинж тэмдэг илэрч байсан бөгөөд шинэ төрлийн вирусын халдвар авсныг нас барсных нь дараа л тогтоосон байна. Шинэ төрлийн короновирусын халдвар нь БНХАУ-ын Ухань хотоос эхэлж дэгдэж, одоо дэлхийн 25 улсад халдвар тархсан нь бүртгэгдэж, 2300 гаруй хүн амь насаа алдаад байгаа юм. Хүнээс хүнд агаар дуслын замаар халдварладаг энэ вивусын халдвараас хамгаалахын тулд амны хаалт зүүж, гараа угааж, ариутгаж, олон нийтийн газраар явахгүй байхыг эрүүл мэндийн мэргэжилтнүүд зөвлөж байгаа билээ. Эх сурвалж: polit.mn