Б.ТУУЛ Эрүүл мэндийн яам цаг үеийн асуудлаар ээлжит мэдээллээ хийлээ. Монгол Улсад өнөөдрийн байдлаар коронавирусын халдвар бүртгэгдээгүй ч зөөвөрлөгдөн орж ирэх өндөр эрсдэлтэй гэсэн дүгнэлт гарчээ. Хэрэв халдвар бүртгэгдсэн тохиолдолд тархах өндөр эрсдэлтэй гэдгийг салбарын яамнаас анхаарууллаа. Тиймээс удахгүй болох цагаан сараар айл бүр гэр бүлийн хүрээнд тэмдэглэн өнгөрүүлж чадвал аюулт өвчнөөс урьдчилан сэргийлэх бүрэн боломжтой гэж зөвлөв. Мөн  ХӨСҮТ-ийн мэдээлснээр коронавирусын сэжигтэй 170 гаруй тохиолдол бүртгэгдээд байгаа гэв.  Тухайлбал, Эрээнээс Зам-Үүд боомтоор хил нэвтэрсэн 103 иргэн эмчийн хяналтад, тусгаарлагдсан нэг иргэнийг хяналтаас гаргаагүй байгаа аж. Эдгээр хүний биеийн байдал сайн байгаа юм байна. Мөн Гашуунсухайт боомтод тусгаарлагдсан 12 хүн эмчийн хяналтад байгаа. Завхан аймагт өчигдөр нэг тохиолдол бүртгэгдэж тусгаарласан. Тухайн хүн Гашуунсухайт боомтоор БНХАУ руу хоёрдугаар сарын 6-12-ны хооронд зорчоод ирсэн, халуурсан, хатгалгааны шинж тэмдэгтэй тусгаарлагдлаа. Завханы иргэнтэй хамт автобусанд явсан 40 хүнийг хамгаалалтад авсан. Мөн өчигдөр ХӨСҮТ-д нэг иргэнийг тусгаарласан. Тусгаарлагдсан иргэн Хятадын Тянжинь хотод сурдаг оюутан гэв. Эх сурвалж: www.polit.mn