Т.САЙХАН Засгийн газрын ээлжит хуралдаанаар гаргасан шийдвэрийн талаар Батлан хамгаалахын сайд, Улсын Онцгой комиссын дэд  дарга Н.Энхболд /02.19/мэдээлэл хийлээ. Тэрээр “Шинжээчдийн үзэж байгаагаар БНХАУ-д өргөн тэмдэглэдэг хаврын баяраар 84 мянган хүн шилжилт хөдөлгөөн хийсэн нь энэ өвчин тархахад нөлөөлсөн гэж үзэж байна. Иймээс ДЭМБ-аас улс орон бүрт энэ өвчний эсрэг авсан арга хэмжээгээ сулруулахгүй байх зөвлөмж хүргүүлж байна.  Эрдэмтэн судлаачид энэ өвчний тархалт энэ оны дөрөвдүгээр сараас буух таамаг дэвшүүлж байгаа юм. Манай улсад шинэ коронавирусын халдвар тархах эрсдэлийн үнэлгээ өндөр гэж гарсан. Иймд Засгийн газрын хуралдаанаар шинэ коронавируст халдвараас урьдчилсан сэргийлэх зорилгоор төрийн болон нутгийн захиргааны байгууллага, хуулийн этгээдийг гамшгаас хамгаалах өндөржүүлсэн бэлэн байдлын зэрэгт шилжүүлэх тухай тогтоол гарган хэрэгжүүлж байсан. Үүнийг ирэх гуравдугаар сарын 30-ныг хүртэл сунгахаар шийдвэрлэлээ” гэсэн юм. -Цагаан сарын баярын өдрүүдээр нийслэлээс гарах орох хөдөлгөөнийг хаах асуудал өнөөдрийн хуралдаанаар яригдсан уу?  -Хот хоорондын замын хөдөлгөөнийг хаах асуудал яригдаагүй. Цагаан сарын хүртэл нэлээд хугацаа байна. Иймээс бид нөхцөл байдалд ойр ойрхон дүн шинжилгээ хийнэ. Зарим аймгууд орох гарах хөдөлгөөнөө хаасан гэх мэдээлэл аваад байна. Гэхдээ ийм шийдвэрийг аймгууд дангаараа бус ЗТХ-ийн сайдтай харилцан зөвшилцөж гаргах ёстой. Эх сурвалж:www.polit.mn