Д.АРИУН АНУ-ын Ерөнхийлөгч Доналд Трамп  жил бүр Конгресст тавьдаг илтгэлээ тавих үеэр болсон зарим үйл явдал улс орныхоо нөхцөл байдлын талаар Ерөнхийлөгчийн хэлсэн үгнээс илүүтэйгээр хэвлэлүүд хийгээд олон нийтийн анхаарлыг татаж, түүнийг тойрсон хэлэлцүүлэг өрнөж байна. Ерөнхийлөгчийг үг хэлэхээр орж ирэхэд танхимын гишүүд түүнд хүндэтгэл үзүүлэн босож алга ташин угтаж авсан. Доналд Трамп хэлэх үгийнхээ хэвлэмэл хувийг Дэд Ерөнхийлөгч болон Төлөөлөгчдийн танхимын дарга Нэнси Пелоси нарт гардуулсан бөгөөд энэ үеэр гар барихаар сунгасан хатагтайг Ерөнхийлөгч хараагүй мэт царайлан өнгөрсөн. Харин Ерөнхийлөгчийг үгээ хэлсний дараа гишүүд босож алга ташихад Төлөөлөгчдийн танхимын тэргүүн хатагтай алга ташихын оронд илтгэлийг урж эсэргүүцлээ илэрхийлэв. Түүнээс гадна Доналд Трамп Ерөнхийлөгчийг илтгэлээ тавьж байхад Ардчилсан намаас сонгогдсон Конгрессийн зарим гишүүн гарч явж эсэргүүцлээ илэрхийлсэн байна. Эх сурвалж: www.polit.mn