Т.САЙХАН “Босоо хөх Монгол” ТББ-ын Удирдах зөвлөлийн гишүүн П.Шинжээравдан Сэлэнгэ аймгийн Мандал сумын иргэн Г-ыг модоор зодож буй бичлэг энэ сарын 24-ний өдөр олон нийтийн сүлжээнд цацагдсан.  Тэгвэл тухайн бичлэг дээрх  52 настай Г гэгч нь энэ сарын 27-ны өдөр модноос өөрийгөө боомилсон байдалтай олдсон байна. Хэргийг Сэлэнгэ аймгийн цагдаагийн газраас шалгаж байгаа бөгөөд олон нийтийн сүлжээнд тавигдсан бичлэг нь талийгаачийг амиа хорлоход хүргэсэн үү гэх асуудал үүсээд байгаа юм.   Энэ тухай мэдээллийг  ЦЕГ-ын Хэвлэл мэдээллийн төвийн дарга, хурандаа Б.Баатархүү ч үгүйсгээгүй.  Тэрээр өөрийн цахим хуудастаа “Фейсбүүкт бичлэг нь цацагдсан иргэн амиа  хорлосон байдалтай олдсон нь үнэн.  Энэ хэргийг Сэлэнгэ аймгийн Цагдаагийн газар шалгаж байна” гэжээ. Талийгаач нь Сэлэнгэ аймгийн харьяат 52 настай эрэгтэй Г гэх иргэн байжээ. "Босоо хөх монгол” ТББ-ын удирдах зөвлөлийн гишүүн П.Шинжээравдан "Нойтон мод бэлтгэж байсан хүмүүст жавтий хүртээв" гэсэн тайлбартай бичлэгийг энэ сарын 24-ны өдөр олон нийтийн сүлжээнд байршуулсан. Үүнээс гурав хоногийн дараа бичлэгт зураг дүрс нь үлдсэн иргэн амиа егүүтгэсэн байдалтай олдоод байна. Эх сурвалж:www.polit.mn