Б.БАЯРЖАВХЛАН Коронавирустэй холбогдуулан Эрүүлмэндийн яамнаас өнөөдөр /01.30/ мэдээлэл хийлээ. Энэ үеэр Дэлхийн эрүүл мэндийн байгууллагын Суурин төлөөлөгч Сергей Диордица “Дэлхийн хэмжээнд дэгдэлтийн тохиолдлын тоо нэмэгдсээр байна. Өнөөдөр 10 цагийн байдлаар батлагдсан тохиолдлын тоо 6.065, нас барсан хүн 132, эдгэрсэн хүн 124 болсон байна. Мөн Арабын нэгдсэн Эмират улсад коронавирусын дөрвөн тохиолдол бүртгэгдсэн.  Өвчний шинж тэмдэг нууцлаг байгаа үед голомтоос шууд ирж байгаа иргэдэд хяналт тавих нь чухал юм. Тохиолдлын тоо тасралтгүй нэмэгдэж байгаа учир ДЭМБ-ын дэргэдэх Онцгой комисс өнөөдөр дахин хуралдахаар болсон. ДЭМБ Монголын ЭМЯ-тай хамтран коронавирусын оношлуурыг дахин худалдан авахаар болсон. ДЭМБ, Дэлхийн эдийн засгийн форумтай хамтран зах зээлийн эрэлт хэрэгцээний судалгааг хийх ба хоёрдугаар сарын 5-нд дуусгахаар төлөвлөж байна. Халдваргүйтэл, мэдээлэл хүргэх, урьдчилан сэргийлэх гээд нүсэр ажил байдаг ба эрүүл мэндийн салбарт ажиллаж буй бүх хүмүүст талархаж буйгаа илэрхийлье” гэв. ХӨСҮТ-ийн захирал Д.Нямхүү “Уржигдар ХӨСҮТ-д 14 сэжигтэй тохиолдолтой хүн ирсэн. Эдгээр хүмүүсийн хариу сөрөг гарсан тул бид зөвлөгөө өгөөд дараагийн арга хэмжээг авч байгаа. Өчигдрийн байдлаар дөрвөн иргэн сэжигтэй тохиолдлоор ирж хоносон. Шинжилгээ нь 24 цагийн дараа буюу, лаборторийн хариу гарахаар мэдээлнэ. Иргэд маань өөрсдөө шинж тэмдгээ хэлээд ирж байгаа зүйлс их байгаа нь сайн хэрэг. Бид бүхэн газруудаас туршлага авч бэлэн байдалд ажиллаж байгаа бөгөөд үндсэн туршлага авч байгаа газар маань хятад орон тул бид өдөр болгон мэдээ солилцож, чиглэл болгон дээрээ бэлтгэл хийж байгаа гэдгийг хэлмээр байна. Бид бусад оронтой туршлага хуваалцаж байгаа тул оношилгоо амжилттай явагдаж байна. Энэ өвчний дамжих зам нь агаар дуслын замаар тул шинэ зүйл зохиож ярихгүй байхад анхаарах хэрэгтэй. Маскаа зөв зүүж, зөв авах хэрэгтэй. Бусадтай холбоо үүсэж байгаа явдлыг хувь хүмүүс өөрсдөө зогсоох хэрэгтэй. Бид нүдэнд үл үзэгдэх дайснуудтай тэмцэж байгаа тул та бүхэн бидний өгсөн зөвлөмжийг гололгүйгээр, хариуцлагатай хэрэгжүүлвэл үр дүнд хүрнэ. Сурагчдыг хичээллүүлэхгүй болсонтой холбоотойгоор гадуур сэлгүүцэх нь ихсэж, дэлгүүр хоршоогоор их явахаа болино уу. Мөн маскны үнийг нэмэхгүйгээр эерэг хандлагаар хандаж, хууль дүрэм, гаргасан зөвлөмжийг биелүүлэх хэрэгтэй” гэв. ЭМЯ-ны Нийгмийн эрүүл мэндийн газрын дарга Д.Нарангэрэл “Бид 24 цагийн бэлэн байдалд ажиллаж байгаа. Цаг тухай бүрт нь мэдээллээр хангаж, танилцуулж байгаа гэдгийг та бүхэн мэдэж байгаа байх. Монгол Улсад одоогоор коронавируысн халдвар бүртгэгдээгүй. Халдвар орохоос нь өмнө авах ёстой урьдчилсан сэргийлэх бүх арга хэмжээг авч ажиллаж байна” гэлээ. Эх сурвалж: www.polit.mn