Т.САЙХАН БНХАУ-д коронавирусын халдвар эрчимтэй тархаж байгаатай холбогдуулан  Монгол Улсын Засгийн газраас зарим шаардлагатай арга хэмжээг аваад байгаа.   Тухайлбал,  өнгөрсөн баасан гаригт Улсын онцгой комисс хуралдаж,  сургууль, цэцэрлэгийн үйл ажиллагааг зогсоов. Мөн олон нийтийн арга хэмжээг ч хориглоод байв.   Түүнчлэн  өнгөрсөн ням гаригт Засгийн газар яаралтай хуралдаж, их дээд сургуулийг хаах, улмаар олныг хамарсан үйл ажиллагаа зохион байгуулахыг хориглосон.  Энэ дагуу зарим хувийн хэвшил, төрийн байгууллагууд ч төлөвлөөд байсан хурал, цуглаан, олон нийтийн үйл ажиллагааг зогсоов.  Гэтэл өнөөдөр /01.27/ Төрийн ордонд Цагаан сарын үзэсгэлэн худалдаа нээгдсэн нь олны шүүмжлэлд өртөөд байна.  Аргагүй шүү дээ.  Төрийн ордон бол онцгой объект.  Тэгээд ч улс орон даяараа  халдварт өвчнөөс сэргийлж, даван туулах арга зам хайж байна.  Гэтэл төр засаг нь нэг өдөр нь шийдвэр гаргачихаад  маргааш нь мартаж, эргээд өөрсдөө зөрчиж байна.    Цагаан сар үзэсгэлэн худалдааг ХХААХҮЯ-наас зохион байгаа. Ер нь бол Засгийн газар нь өөрөө л гэсэн үг.  Энэ худалдаанд зах дээр байдаг бүхий л зүйл байна.  Дээл бүс, гутал хувцсаас эхлээд цагаан идээ хүртэл худалдаалагдаж байлаа.  Төрийн ордондоо хар зах авчирч болох юм гэхэд ийм онцгой нөхцөл нээсэн нь ёстой л Монгол төрийн доройтлыг харуулаад байна. Эх сурвалж:www.polit.mn