Б.БАЯРЖАВХЛАН Короновирустэй холбогдуулан Эрүүлмэндийн яамнаас мэдээлэл хийлээ. Тус вирусын халдвар нь БНХАУ-ын 30 муж, Макао, Хонгконг, Тайвань, Сингапур, Австрали, Канад, АНУ, БНСУ, Япон, Непаль, Вьетнам, Франц, Малайз гэсэн 14 оронд  бүртгэгдээд байгаа ажээ. Харин манай улсад одоогоор бүртгэгдээгүй байгаа юм байна. Энэ талаар ЭМЯ-ны Төрийн захиргаа удирдлагын газрын дарга Б.Цогтбаатар “Нэгдүгээр сарын 27-ны 10.00 цагийн ДЭМБ-ын мэдээгээр короновирусээр өвчилсөн 2796, нас барсан 80 хүн байна. Халдвар авсан дээрх хүмүүсийн 2761 нь Хятад улсад, 35 тохиолдол нь бусад улсад, нас барсан 80 хүн нь бүгд Хятад улсад бүртгэгдсэн. 461 хүн сэхээний тасагт эмчлүүлж байна. Мөн Өвөрмонголд 7, Манжуурт 2, Шилийн голд 1, Эрээнд 4 сэжигтэй тохиолдолд бүртгэгдээд байна. Харин манай улсад короновирусийн халдвар бүртгэгдээгүй. Улсын Онцгой комиссын үнэлгээгээр короновирусийн халдварт өртөх эрсдэлийн зэрэг дундаас өндөр зэрэгт шилжсэн” гэв. Эмнэлгийн тусламжийн газрын дарга Я.Буянжаргал “Бид ДЭМБ-аас өгсөн зөвлөмжийн дагуу бэлэн байдлыг хангаж ажиллаж байгаа. Эмч мэргэжилтнүүддээ онлайн сургалт, зөвлөгөө өгч байна. Монгол Улс вирусийн халдварын 21 үүсгэгчийг илрүүлдэг. Олон улсын итгэмжлэгдсэн лабораториор баталгаажуулж явдаг учир эргэлзэх хэрэггүй. Харин Ухань хотод байгаа манай улсын 31 иргэнийг Хятадын тал хариуцаж ажиллаж байгаа. Хятадын тал зөвшөөрвөл манай улс онгоц гаргаж иргэдээ авч ирэхэд бэлэн. Хэрэв Ухань хотод байгаа иргэд ирвэл ХӨСҮТ-д тусгаарлан, 14 хоногийн турш эмнэлгийн хяналтад байлгах болно” гэсэн юм. Харин энэ талаар ХӨСҮТ-ийн захирал А.Амбасэлмаа “ Короновирусын халдвар томуугийн ерөнхий шинж тэмдгээр илэрч байна. Өчигдрөөс гэдэс ходоодны хямрал, хүндэрсэн хатгаа, суулгалт, уушги, зүрхний эмгэгийн шинж тэмдгээр илэрч байгааг Хятадын эрүүлмэндийн байгууллагаас анхааруулсан. Тиймээс гадаад руу явж ирсэн иргэд эрүүлмэнддээ хянамгай байхыг зөвлөж байна. Хэрэв танд короновирусын шинж тэмдэг илэрвэл ХӨСҮТ-д дуудлага өгөхийг зөвлөж байна” гэлээ. Эх сурвалж: www.polit.mn